Protesta përpara Kryeministrisë ka vijuar për të 92-ën ditë radhazi, ndërsa në fjalimet e mbajtura në shesh u ngritën akuza ndaj qeverisë për gjendjen e sistemit shëndetësor, menaxhimin e territorit pas zjarreve, modelin e zhvillimit turistik dhe përqendrimin e pasurisë.
Gazetari Osman Stafa, nga foltorja e protestës, u ndal te problematikat e sistemit shëndetësor dhe rastet e pacientëve që, sipas tij, nuk marrin trajtimin e nevojshëm.
Stafa e nisi fjalën duke vlerësuar qëndresën e qytetarëve që vijojnë të protestojnë prej 92 ditësh, pavarësisht temperaturave të larta.
“Asnjëherë historia e Shqipërisë nuk ka parë një protestë që zgjat 92 ditë dhe nuk i ndihet fundi, sepse në këtë betejë është e ardhmja jonë dhe e Shqipërisë. Po bëni historinë! Po bëni qëndresë, rezistencë, po tregoni forcë e dinjitet. Nuk doni një Shqipëri të vjedhur e të korruptuar, por një vend ku të jetoni me dinjitet”, deklaroi gazetari.
Më tej, Stafa kritikoi qeverinë për mënyrën se si po promovohen shërbimet e reja shëndetësore, duke iu referuar një videoje të publikuar pak ditë më parë nga kryeministri Edi Rama dhe ministrja e Shëndetësisë.
Sipas tij, pavarësisht njoftimeve për ofrimin e arteriografisë dhe trombektomisë për pacientët me goditje ishemike, këto shërbime nuk janë realisht të aksesueshme nga qytetarët shqiptarë.
“Para tri ditësh kryeministri Rama publikoi një video të ministres së Shëndetësisë ku u tha se qytetarët me goditje ishemike do të kishin në shërbim arteriografinë dhe trombektominë. Sot po ju thosha se ata gënjyen! Këto shërbime nuk jepen për qytetarët shqiptarë. Mungesa e këtij trajtimi të çon në vdekje ose në paralizë”, u shpreh Stafa.
Gazetari akuzoi gjithashtu qeverinë se fondet publike nuk po orientohen drejt nevojave të qytetarëve, duke përmendur projekte dhe çështje të debatuara publikisht.
Gjatë fjalës së tij, Stafa solli edhe rastin e një pacienteje nga Maliqi, të cilin e përdori si shembull për të denoncuar problematikat me trajtimin e pacientëve me sëmundje tumorale. Sipas tij, gruaja ishte sorollatur për muaj me radhë për trajtimin e kancerit të gjirit dhe ishte paraqitur në spital në gjendje të rënduar.
Pretendimet e bëra nga Stafa për rastin e pacientes dhe për aksesin në shërbimet e trombektomisë nuk u shoqëruan me dokumente apo të dhëna zyrtare gjatë fjalimit.
Kola: Pas zjarreve u hapën procedura për panelet diellore
Në vijim të protestës, aktivisti Arben Kola ngriti akuza lidhur me zjarret e fundit që përfshinë zonat malore të Pukës dhe Fushë-Arrëzit.
Kola pretendoi se më pak se pesë ditë pas rënies së zjarreve, pushteti lokal kishte hapur procedura për projekte të energjisë së rinovueshme në zonat e prekura.
“Bashkia e Pukës, pa pikë turpi, në më pak se 5 ditë nga djegia e maleve të Pukës dhe Fushë-Arrëzit, shpalli një konkurs për vendosjen e paneleve diellore në kodra e male, si edhe për helikat e erës për prodhimin e energjisë elektrike. Ja pse po i djegin malet, për t’i mbushur me panele diellore për llogari të mafias politike anti-shqiptare”, u shpreh ai.
Aktivisti pretendoi gjithashtu se zonat e djegura mund të synohen për projekte ndërtimi dhe resortesh, duke e lidhur këtë me shpopullimin e zonave malore.
Për lidhjen e pretenduar mes zjarreve dhe projekteve të energjisë apo ndërtimit, Kola nuk paraqiti prova konkrete gjatë fjalimit.
Progni: “Ku është shqiptari në këtë model turistik?”
Aktivisti Gent Progni u ndal te modeli ekonomik dhe turistik i qeverisë, duke argumentuar se projektet luksoze nuk sjellin domosdoshmërisht përfitime për bizneset e vogla dhe familjet shqiptare.
“Sot na thonë se Shqipëria po bëhet fuqi turistike. Rama promovon projekte luksoze që na paraqiten si e ardhmja, por pyetja është: ku është shqiptari në këtë model? Turisti zbret në aeroport, e merr resorti, ha, pi dhe argëtohet aty dhe paratë qarkullojnë brenda të njëjtit sistem. Po artizani, po restoranti familjar? Kjo nuk është vetëm çështje ekonomike, por demokracie”, deklaroi ai.
Progni kërkoi një model zhvillimi që, sipas tij, të shpërndajë përfitimet te një numër më i madh qytetarësh dhe të fuqizojë biznesin e vogël.
“Ne nuk duam një Shqipëri ku të kemi resorte me 5 yje dhe demokraci me 1 yll! Duam turizëm që pasuron mijëra familje, ku fuqizohet biznesi i vogël dhe shpërndahen mundësitë. Sa më e fortë të jetë shtresa e mesme, aq më e vështirë bëhet të blihet një shoqëri”, u shpreh Progni.
Lika: Një i ri nuk mund të blejë apartament
Në fund, aktivisti Edison Lika u ndal te çmimet e pasurive të paluajtshme, largimi i të rinjve dhe përqendrimi i pasurisë.
Lika pretendoi se politikat e qeverisë kanë vështirësuar mundësinë e të rinjve për të blerë një banesë dhe për të krijuar familje.
“Një i ri sot në Shqipëri e ka të pamundur të blejë një apartament dhe të krijojë familje. Kjo është axhenda e Ramës kundër familjes. Ndër të tjera, a e dini se sa e ka dëmtuar pronën private Edi Rama? Shqipëria iu është shitur një dore oligarkësh. Tanimë nuk kemi as pronë publike dhe as private”, deklaroi ai.
Lika foli edhe për varfërinë dhe lirinë qytetare, duke pretenduar se 40% e shqiptarëve jetojnë në varfëri, pa dhënë gjatë fjalimit burimin e kësaj shifre.
“Na thoni sa të lirë jeni nën sundimin e Ramës, ku liria jonë është vetëm të zgjedhim nëse do të bëhemi kriminelë apo patronazhistë. Sa të barabartë jemi nën këtë regjim, ku Shqipëria është pronë e 5 personave dhe të tjerët janë të detyruar të largohen?”
Në përmbyllje, Lika u bëri thirrje qytetarëve që t’i bashkohen protestës, duke kërkuar largimin e kryeministrit Edi Rama.
Fjalimet e ditës së 92-të të protestës u përqendruan në disa prej çështjeve më të debatuara në vend: shëndetësinë, përdorimin e fondeve publike, zjarret dhe përdorimin e territorit, modelin e zhvillimit turistik, çmimet e banesave, varfërinë dhe emigrimin e të rinjve.
Protestuesit i lidhën këto problematika me një akuzë të përbashkët ndaj qeverisë për keqqeverisje dhe përqendrim të pasurisë dhe mundësive ekonomike te një grup i kufizuar përfituesish. a.b
