Kreu i Partisë Demokratike, Sali Berisha, ka komentuar arrestimin e biznesmenit Ergys Agasi, duke ngritur akuza ndaj qeverisë dhe Prokurorisë për mënyrën e trajtimit të çështjes.
Në një bisedë me ndjekësit e tij në rrjetet sociale, Berisha tha se akuzat ndaj Agasit janë zbutur dhe se biznesmeni është “çliruar” nga akuza për pengmarrje.
Sipas Berishës, Agasi ishte një prej personave me ndikim të madh në atë që ai e cilësoi si “pushteti i zi” i lidhur me qeverinë dhe Edi Ramën.
Berisha tha se që nga arrestimi kanë lindur dyshime për një arrestim të negociuar, duke iu referuar lëvizjeve të Agasit para arrestimit dhe rrethanave në të cilat ai u vu në pranga. Ai përmendi negociata të mundshme të zhvilluara nga Taulant Balla në Elbasan, duke kërkuar që këto pretendime të hetohen.
Një tjetër element që, sipas Berishës, shton dyshimet lidhet me policin që shoqëronte Agasin. Ai pretendoi se polici, në ditën kur po transportonte biznesmenin nga Elbasani në Durrës, kishte marrë pjesë edhe në një ceremoni në Akademinë e Policisë.
Berisha theksoi se këto janë dyshime dhe jo fakte të provuara, por u ndal te ajo që e konsideron si çështjen më të rëndë: ndryshimin e akuzës.
“Ajo që është jashtëzakonisht e rëndë, ajo që fakton dorën e zezë të Edi Ramës, është çlirimi i tij nga akuza e pengmarrjes”, deklaroi Berisha.
Sipas tij, Agasi është i përfshirë në organizimin e dy rasteve të pengmarrjes dhe pretendoi se është ndërhyrë që termi “pengmarrje” të zëvendësohet me “heqje lirie”.
Berisha kritikoi gjithashtu akuzën për korrupsion pasiv dhe pabarazi në tendera. Ai tha se është paradoksale që Agasi të akuzohet për pabarazi në tendera, pasi, sipas tij, biznesmeni nuk kishte autoritet ligjor për të zhvilluar tendera.
Duke iu referuar deklaratave të avokatit Maks Haxhia, Berisha tha se mbrojtja e Agasit argumenton se klienti i tij nuk ka zhvilluar tendera dhe nuk ka përfituar prej tyre. Kreu i PD-së, megjithatë, pretendoi se Agasi ka ushtruar ndikim mbi tendera përmes presionit dhe dhunës.
Berisha: Pse Agasi u dërgua në burgun e Bradasheshit?
Një pjesë tjetër e deklaratës së Berishës iu kushtua vendimit për dërgimin e Agasit në burgun e Bradasheshit.
Berisha ngriti pikëpyetje mbi këtë vendim, duke thënë se burgu kontrollohet nga Taulant Balla, Sara Mila dhe “karteli Çela”.
“Dhe e treta, tani e marrin dhe e çojnë në burgun e Bradasheshit. Hajde tani, më thoni ju mua, se a është e negociuar kjo apo jo?”, tha Berisha.
Ai tha se në vend që Agasi të dërgohej në një burg me nivel të lartë sigurie dhe izolimi, është vendosur në një institucion që, sipas tij, është nën ndikimin e personave të lidhur me Partinë Socialiste.
Berisha e konsideroi arrestimin e Agasit një zhvillim pozitiv, por kërkoi që procesi të monitorohet nga agjencitë ndërkombëtare të zbatimit të ligjit.
“Duke e konsideruar një akt realisht pozitiv arrestimin e tij, iu bëj thirrje agjencive ndërkombëtare të zbatimit të ligjit të angazhohen në hetimin dhe monitorimin e këtij procesi”, u shpreh ai.
Sipas Berishës, hetimi është i rëndësishëm jo vetëm për Shqipërinë, por edhe për vendet partnere dhe NATO-n.a.b
