Mbreti Harald V i Norvegjisë është ndarë nga jeta në moshën 89-vjeçare, pasi ishte shtruar në spital javën e kaluar për trajtimin e një sëmundjeje të rrallë të gjakut.
Pallati Mbretëror ka njoftuar se Harald ndërroi jetë mëngjesin e së premtes në Spitalin Kombëtar në Oslo. Në orët e fundit të jetës së tij, familjarë të afërt e vizituan në spital, ndërsa qytetarë të shumtë vendosën lule pranë pallatit mbretëror.
Pas 35 vitesh në fron, Harald do të pasohet nga djali i tij, Princi i Kurorës Haakon.
Harald V do të kujtohet si një monark popullor dhe modernizues, i cili kontribuoi në përshtatjen e monarkisë norvegjeze me shoqërinë moderne. Ai theu gjithashtu një traditë të vjetër mbretërore duke u martuar me Sonja Haraldsen, një grua jashtë familjeve mbretërore evropiane.
I konsideruar si një figurë e thjeshtë dhe e afërt me qytetarët, Harald ishte cilësuar shpesh si “gjyshi i kombit” dhe “Mbreti i Popullit”, një epitet që ishte përdorur edhe për babanë e tij, Olav V.
Vitet e fundit, familja mbretërore norvegjeze është përballur me probleme shëndetësore dhe polemika publike. Në qendër të vëmendjes kanë qenë veçanërisht lidhjet e nuses së tij, Mette-Marit, me Jeffrey Epstein, si dhe çështja gjyqësore e djalit të saj, Marius Borg Høiby.
Harald la pas bashkëshorten e tij, Mbretëreshën Sonja, me të cilën ishte martuar për gati 58 vite, vajzën e tyre, Princeshën Märtha Louise, djalin Haakon dhe gjashtë nipër e mbesa.
Fëmijëria dhe rrugëtimi drejt fronit
Harald lindi më 21 shkurt 1937 në pronën Skaugum, pranë Oslos. Ai ishte vetëm tre vjeç kur Gjermania naziste pushtoi Norvegjinë në vitin 1940.
Gjatë Luftës së Dytë Botërore, nëna e tij u largua me fëmijët drejt Suedisë dhe më pas familja udhëtoi për në Shtetet e Bashkuara, me ftesë të presidentit amerikan Franklin D. Roosevelt.
Pas përfundimit të luftës, Harald u kthye në Norvegji, ku përfundoi arsimin dhe shërbimin e detyrueshëm ushtarak. Në vitin 1957, pas vdekjes së gjyshit të tij, ai u bë princ i kurorës.
Nga viti 1960 deri në vitin 1962 studioi shkenca shoqërore, histori dhe ekonomi në Balliol College të Universitetit të Oksfordit.
Harald u njoh me Sonja Haraldsen, vajzën e një biznesmeni, në një festë. Marrëdhënia e tyre u përball me kundërshtime për shkak të prejardhjes së saj jo-mbretërore dhe çiftit iu desh të priste nëntë vite përpara se të merrte miratimin për martesë.
Mbreti Olav V kishte shpresuar që i biri të martohej me një princeshë evropiane, por në fund dha pëlqimin për martesën. Harald dhe Sonja u martuan në Katedralen e Oslos më 29 gusht 1968.
Në vitin 1990, kur shëndeti i Mbretit Olav u përkeqësua, Harald mori detyrën e regjentit. Një vit më vonë, më 17 janar 1991, pas vdekjes së të atit, ai u ngjit në fronin norvegjez.a.b
