Një ngjarje tragjike ka tronditur komunitetin shqiptar në Jacksonville të Floridës, ku tre fëmijë kanë humbur jetën pasi një zjarr përfshiu një banesë dykatëshe në zonën Mandarin.
Sipas informacioneve të komunitetit shqiptar, familja është me origjinë nga Lushnja dhe jeton prej vitesh në Shtetet e Bashkuara.
Zjarri ka shpërthyer rreth orës 05:13 të mëngjesit të së mërkurës në Windergate Drive. Zjarrfikësit kanë mbërritur rreth katër minuta më vonë dhe kanë gjetur banesën të përfshirë nga flakët në katin e parë, ndërsa kati i dytë ishte mbuluar nga tymi i dendur.
Dy të rritur dhe dy fëmijë kanë mundur të dalin nga banesa para mbërritjes së zjarrfikësve dhe janë transportuar në spital për të marrë ndihmë mjekësore. Tre fëmijët e tjerë janë gjetur pa shenja jete brenda banesës.
Sipas komunitetit shqiptar, viktimat janë dy binjakë 11-vjeçarë dhe një djalë 2-vjeçar.
Një foshnjë 2-muajshe dhe një i rritur raportohet se janë nxjerrë nga dritarja e katit të dytë, ndërsa persona që ndodheshin pranë banesës kanë ndihmuar për t’i kapur pasi u nxorën jashtë.
Zjarrfikësit kanë arritur ta vënë zjarrin nën kontroll rreth orës 05:38. Banesa është shkatërruar plotësisht, ndërsa dy banesa të tjera pranë saj kanë pësuar dëmtime.
Shkaqet e zjarrit mbeten ende për t’u përcaktuar, ndërsa autoritetet po vijojnë hetimet për zbardhjen e plotë të rrethanave të tragjedisë.m.k
