Policia e Shtetit ka konfirmuar arrestimin e Ergys Agasit, i shpallur në kërkim nga Prokuroria e Posaçme kundër Korrupsionit dhe Krimit të Organizuar (SPAK).
Arrestimi u krye në Durrës në kuadër të operacionit policor të koduar “The Wanted”, të zhvilluar nga Drejtoria Vendore e Policisë Durrës dhe strukturat operacionale të Drejtorisë së Përgjithshme të Policisë së Shtetit, në bashkëpunim me SPAK.
Në momentin e arrestimit, Agasi udhëtonte me një automjet ku ndodhej edhe Ulian Shpataraku, ish-drejtues i Policisë së Elbasanit. Ulian Shpataraku ka drejtuar Policinë e Elbasanit si drejtor i komanduar kur Ilir Proda la këtë drejtori dhe u bë drejtor i Policisë së Shtetit. Më herët ishte n/drejtor. Në 2022 ka qenë shef Antidroge në këtë qark, është pezulluar dhe proceduar për lirimin e një personi në kërkim dhe në maj të këtij viti u përjashtua përfundimisht nga Policia e Shtetit.
Policia ka konfirmuar se Shpataraku është kapur dhe arrestuar gjithashtu gjatë operacionit.
Agasi ishte shpallur në kërkim nga SPAK në kuadër të hetimeve të një dosjeje të bujshme, ndërsa ndaj tij rëndojnë akuza të lidhura me veprimtarinë kriminale dhe procedurat e prokurimeve publike.
Arrestimi i dy personave është bërë pjesë e operacionit “The Wanted”, ndërsa pritet që SPAK dhe Policia e Shtetit të japin më shumë detaje mbi rrethanat e ndalimit dhe akuzat konkrete që lidhen me secilin prej tyre.
