Këshilli i Lartë Gjyqësor ka vendosur të nisë zbatimin e vendimit të Gjykatës Kushtetuese për pagat e magjistratëve, duke miratuar pagën referuese bazë për gjyqtarët dhe duke urdhëruar rillogaritjen e pagave dhe pagesën e diferencave.
Vendimi nr. 435, i miratuar më 26 gusht 2026, vjen në një kohë kur qeveria nuk kishte ndërmarrë ende hapat për zbatimin e vendimit të Gjykatës Kushtetuese nr. 15, datë 17 shkurt 2026.
Sipas vendimit të KLGJ-së, paga referuese bazë e magjistratit gjyqtar përcaktohet në bazë të kategorisë së lartë drejtuese “Kategoria I” dhe klasës së pagës “Klasa 1-2”. Ajo përbëhet nga paga për pozicion prej 222 425 lekësh dhe shtesa e nivelit të kualifikimit prej 14 000 lekësh.
Kjo pagë do të zbatohet për periudhën nga 1 gushti 2026 e në vazhdim.
KLGJ ka ngarkuar strukturat përgjegjëse për buxhetin në gjykatat e të tre niveleve që të nisin pagesën sipas pagës së re, si dhe të përllogarisin efektet financiare të rillogaritjes për periudhën nga 1 prill 2023 deri më 31 korrik 2026.
Për diferencat e krijuara nga rillogaritja e pagave, KLGJ ka parashikuar kërkimin e fondeve shtesë pranë Ministrisë së Financave, me pagesat që do të shtrihen në vitet buxhetore 2027 dhe 2028.
Vendimi parashikon gjithashtu që paga e re referuese të përdoret në përgatitjen e kërkesave buxhetore për periudhën 2027-2029.
Ndërkohë, për prokurorët, situata mbetet ende e hapur. Këshilli i Lartë i Prokurorisë nuk ka marrë deri tani një vendimmarrje përkatëse për zbatimin e vendimit të Gjykatës Kushtetuese.
Vendimi i KLGJ-së hyn në fuqi menjëherë dhe do të publikohet në faqen zyrtare të institucionit.
