Nënkryetari i Partisë Demokratike, Belind Këlliçi, ka reaguar pas arrestimit të Ergys Agasit në Elbasan, duke ngritur pikëpyetje mbi rrethanat dhe kohën e ndalimit të tij.
Në një postim në rrjetet sociale, Këlliçi pretendon se Agasi, ndonëse ishte shpallur në kërkim prej muajsh, vijonte të lëvizte lirshëm dhe se në momentin e arrestimit ishte duke udhëtuar nga Elbasani drejt Durrësit, nën shoqërinë e një ish-drejtuesi të lartë të Policisë së Shtetit.
“Cilat raporte në kupolën e Organizatës janë prishur, që u arrestua sot Gysi i Ramës?!”, shkruan Këlliçi.
Sipas deputetit demokrat, arrestimi i Agasit konfirmon, sipas tij, denoncimet e opozitës se ai kishte pasur mbrojtje shtetërore, pavarësisht se ishte në kërkim policor.
Këlliçi ngre më tej një seri pikëpyetjesh politike mbi kohën e arrestimit, duke e lidhur atë me përplasjet e brendshme në mazhorancë dhe ndryshimet e pritshme në qeveri.
Ai hedh tezën se arrestimi mund të jetë një lëvizje e lidhur me ish-zëvendëskryeministren Belinda Balluku dhe pretendon se kjo mund të shërbejë si presion ndaj kryeministrit Edi Rama.
“Është e thjeshtë dhe e logjikshme teza që kjo të jetë një lëvizje emergjente e Ballukut, nën urdhërat e të cilës është kryepolici Skënder Hita, si shenjë presioni ndaj Edi Ramës!!!”, shkruan Këlliçi.
Duke iu referuar protestave të 88 ditëve dhe ndryshimeve të pritshme në qeveri gjatë shtatorit, deputeti demokrat pretendon se përplasjet brenda mazhorancës mund të jenë thelluar.
Këlliçi përmend gjithashtu mundësinë e një kërkese të dytë të SPAK për heqjen e imunitetit të Ballukut, duke e paraqitur arrestimin e Agasit si një mesazh politik brenda mazhorancës.
Në përfundim, ai e lidh arrestimin me persona të tjerë që, sipas tij, mund të jenë në rrezik përballë zhvillimeve të ardhshme, duke shkruar me tone ironike: “Sot i’a arrestoi Gysin, në makinë me Shpatarakun! Nesër, mbase i arreston Olsin, në ndonjë zyrë kadastre, apo ambjent kazinoje!”
Deklaratat e Këlliçit janë qëndrime politike dhe akuza të tij, ndërsa pretendimet për ndërhyrje politike apo mbrojtje shtetërore nuk përbëjnë fakte të provuara.
