Inspektorati Kombëtar për Mbrojtjen e Territorit (IKMT) ka ndërhyrë gjatë ditës së sotme në Qeparo, në territorin e Bashkisë Himarë, ku ka shembur një objekt 4-katësh, me një kat nëntokë, të ndërtuar pa leje.
Sipas IKMT-së, objekti ishte ndërtuar me konstruksion beton-arme dhe punimet ishin kryer në kushtet e flagrancës.
Nga verifikimet e kryera ka rezultuar se subjekti pretendonte se kishte ndërtuar më herët një objekt njëkatësh, me një kat nëntokë, për të cilin kishte aplikuar për leje legalizimi pranë Agjencisë Shtetërore të Kadastrës.
Megjithatë, sipas IKMT-së, brenda pak ditësh subjekti ka vijuar punimet duke shtuar edhe tre kate të tjera, duke kryer betonime pa armaturë.
IKMT ka bërë të ditur se të gjitha materialet e rastit do t’i referohen Prokurorisë për hetime të mëtejshme. Inspektorati deklaron gjithashtu se do të bashkëpunojë me organet ligjzbatuese për sqarimin e plotë të rrethanave dhe evidentimin e përgjegjësive ligjore.
