Situata në Krujë është përkeqësuar mbrëmjen e sotme për shkak të zjarreve, të cilat janë përhapur ndjeshëm në disa zona. Autoritetet kanë urdhëruar evakuimin e menjëhershëm të banorëve në zonën Barabit–Lluban.
Në njoftimin zyrtar, autoritetet u bëjnë thirrje banorëve të ndjekin udhëzimet e strukturave në terren dhe të bashkëpunojnë gjatë procesit të evakuimit.
Ndërkohë, në lagjen Abaze, ku u raportua edhe vatra fillestare e zjarrit gjatë mesditës, janë aktive tre vatra. Flakët kanë avancuar edhe në drejtim të Rrugës së Malit të Krujës, ku raportohet se është në rrezik edhe një restorant.
Zjarri kërcënon banesa në zonat Lluban, Barabit, Abaze, Rruga e Malit dhe Kërçinë.
Përmasat e flakëve janë të mëdha dhe tymi e ndriçimi i zjarrit raportohet se janë të dukshme edhe nga Tirana.
Autoritetet dhe strukturat e emergjencave vijojnë ndërhyrjen në terren, ndërsa situata mbetet në monitorim për shkak të përhapjes së vatrave.
