Protesta e 71-të kundër kryeministrit Edi Rama është shoqëruar me thirrje për një mobilizim më të gjerë të shoqërisë. Nga sheshi para Kryeministrisë, një prej protestuesve iu drejtua veçanërisht intelektualëve, mësuesve, bluzave të bardha dhe fermerëve, duke u bërë thirrje të bashkohen në protestë.
Gjatë fjalës së tij, qytetari kritikoi ashpër kryeministrin Rama, duke e akuzuar për lidhje me krimin dhe për korrupsion.
“Kryeministri ynë një autokrat, hajdut, vagabond. I lidhur me bandat kriminale. Doli me platformën për besën. Por çfarë bese? Ai një vit më parë i shkatërroi në Theth. Intelektualët, mësuesit, bluzat e bardha të dalin në shesh të protestojnë. Fermeri të vijë në protestë. Kjo është gjëja më e bukur e Shqipërisë”, deklaroi protestuesi.
Ai bëri thirrje edhe për mobilizim gjatë ditëve të ardhshme, duke iu referuar datave 14, 15 dhe 16.
“Më 14, 15, 16 diaspora në Tiranë dhe të gjithë qytetarët në Shqipëri të bashkohen në shesh”, përfundoi ai.
Në protestën e sotme, qytetarët kanë përsëritur kërkesat për largimin e kryeministrit Edi Rama dhe krijimin e një qeverie teknike.
Një tjetër aktivist i ka bërë thirrje SPAK-ut të nisë hetimet ndaj kryeministrit Rama, të cilin e akuzoi për korrupsion dhe lidhje me krimin.
“Kjo qeveri duhet të largohet për të shkuar para drejtësisë sepse është e zhytur në krim e korrupsion. I kujtojmë SPAK se shqiptarët për 71 ditë qëndrojnë në Bulevard dhe nuk i kanë marrë pushimet. Edhe ju, prokurorë të SPAK, hetoni Edi Ramën si kokën e krimit e korrupsionit në Shqipëri, sepse faktet i keni”, u shpreh aktivisti.
Protestuesit vijojnë tubimin para Kryeministrisë, duke kërkuar ndryshime politike dhe largimin e qeverisë Rama.
