Kristjan Sterjo, i dyshuari për vrasjen e 20-vjeçarit Joan Zuko në Korçë, është arrestuar pranë banesës së tij pas disa orësh kërkime nga Policia dhe forcat RENEA.
Sipas raportimeve, policia kishte marrë informacion se Sterjo mund të rikthehej në banesën e tij dhe ka organizuar operacionin për kapjen e tij.
Joan Zuko u vra pasditen e së shtunës në lagjen nr. 15 të Korçës, pas një konflikti mes disa personave që dyshohet se kishte nisur më herët. Përplasja më pas është përshkallëzuar dhe është përdorur armë zjarri.
Sipas dëshmive paraprake, Zuko dyshohet se është ndjekur nga autori drejt një zone me pallate, ku më pas është qëlluar me armë zjarri. Policia ka bërë me dije se viktima është qëlluar me armë tip kallashnikov.
Zv.drejtori i Hetimit të Krimeve në Korçë, Sejfulla Metko, deklaroi pas ngjarjes se konflikti dyshohet se ka qenë i hershëm mes palëve.
“Konflikti ka qenë i mbartur nga disa kohë më parë”, deklaroi Metko, duke shtuar se viktima kishte pasur me vete edhe një thikë.
Pas ngjarjes, policia shoqëroi në Komisariat tre persona të dyshuar si të përfshirë në konflikt, ndërsa forcat e rendit vijuan kërkimet për autorin e dyshuar.
Sipas të dhënave të raportuara, Sterjo është përballur edhe më herët me probleme me ligjin, ndërsa ka qenë i arrestuar për një rast plagosjeje me thikë.
Hetimet vijojnë për të zbardhur motivin e konfliktit dhe rrethanat e plota të vrasjes së 20-vjeçarit, si dhe për të përcaktuar përgjegjësitë e personave të tjerë të përfshirë.
