Aktivistja Luçjana Kokaj ka deklaruar nga protesta para Kryeministrisë se qëndresa qytetare, e cila ka hyrë në ditën e 70-të, ka arritur të kapërcejë frikën dhe të bashkojë qytetarët rreth kërkesës për ndryshim politik.
Duke iu përgjigjur kritikëve që pyesin se çfarë ka arritur protesta, Kokaj tha se një nga rezultatet kryesore është mobilizimi i qytetarëve.
“Kemi arritur shumë; kemi vrarë frikën për 70 ditë”, u shpreh ajo.
Kokaj tha gjithashtu se protesta ka tërhequr vëmendjen e mediave ndërkombëtare dhe se qytetarët kanë përcjellë mesazhin e tyre përmes angazhimit qytetar.
Ajo theksoi se Shqipëria ka nevojë për më shumë kurajë dhe përfshirje qytetare në rrugën drejt Bashkimit Evropian.
“Shqipëria ka nevojë për shpirtin, kurajon tuaj, për të shkuar në BE. Ndaj nuk na duhet kjo qeveri e korruptuar. Do të bëjmë revolucion”, deklaroi Kokaj.
Duke iu drejtuar kryeministrit Edi Rama, aktivistja tha se protestuesit nuk do të tërhiqen nga qëndresa.
“E vetmja besë që do të marrësh nga ne, zoti Kryeministër, është që nuk largohemi pa ikur ti”, u shpreh ajo.
Kokaj iu drejtua edhe të rinjve shqiptarë, duke i cilësuar ata si një forcë që mund të sjellë ndryshimin në vend.
Protestuesit janë stacionuar para Kryeministrisë pas marshimit të nisur nga sheshi “Skënderbej”. Ata kanë kaluar përgjatë bulevardit “Dëshmorët e Kombit”, ndërsa një prej thirrjeve kryesore të turmës ka qenë “Rama, jep dorëheqjen!”.
Protesta e sotme shënon ditën e 70-të të qëndresës qytetare. Sipas organizatorëve, lëvizja nisi fillimisht si reagim ndaj projektit për ndërtimin e një resorti turistik në Zvërnec, por më pas mori një karakter më të gjerë politik, me kërkesa për ndryshime institucionale dhe dorëheqjen e kryeministrit Edi Rama.
