Policia e Vlorës ka shpallur në kërkim ish-efektivin e Policisë së Shtetit, Ulian Shpataraku, i cili dyshohet se ka kanosur punonjësit e një hoteli në zonën e Palasës dhe më pas është larguar nga vendngjarja.
Procedimi penal është regjistruar pas kallëzimit të bërë nga stafi i hotelit, ndërsa policia ka nisur veprimet për lokalizimin dhe kapjen e tij. Hetimet vijojnë për zbardhjen e plotë të rrethanave të ngjarjes.
Shpataraku ishte larguar më herët nga radhët e Policisë së Shtetit, pasi gjatë verifikimeve të kryera pas emërimit të drejtorit të Përgjithshëm, Skënder Hita, rezultoi se nuk paraqitej në vendin e punës.
Emri i tij është përmendur edhe më parë në media për shkak të afërsisë me ish-drejtorin e Përgjithshëm të Policisë së Shtetit, Ilir Proda, me të cilin raportohet se ka pasur marrëdhënie të ngushta.
