Protesta qytetare para Kryeministrisë ka hyrë në ditën e saj të 46-të, ndërsa organizatorët kanë ritheksuar se tubimet do të vijojnë çdo ditë deri në realizimin e kërkesave të tyre.
Gjatë protestës, aktivistja Sidorela Vatnikaj iu drejtua qytetarëve me një fjalim, ku rikujtoi ngjarjen që, sipas organizatorëve, shërbeu si pikënisje e lëvizjes protestuese. Ajo iu referua incidentit të ndodhur gjatë një proteste kundër ndërtimeve në zonat e mbrojtura, ku një protestues u shoqërua me forcë nga policia.
Sipas Vatnikajt, ajo ngjarje simbolizon mënyrën se si, sipas saj, janë trajtuar qytetarët që kundërshtojnë vendimmarrjen e qeverisë.
Në fjalën e saj, aktivistja kërkoi sërish dorëheqjen e kryeministrit Edi Rama dhe propozoi vendosjen e një kufizimi prej dy mandatesh për postin e kryeministrit në Shqipëri.
Ajo akuzoi gjithashtu qeverinë për injorimin e kërkesave të protestuesve dhe kritikoi atë që e cilësoi si një sistem oligarkik që ka përqendruar kontrollin mbi institucionet dhe pasuritë publike.
Protestuesit kanë bërë të ditur se tubimet do të vazhdojnë edhe në ditët në vijim, duke këmbëngulur se lëvizja do të vijojë deri në përmbushjen e objektivave të saj.m.k
