Pas shkarkimit të Anuela Ristanit nga detyra e kryetares së komanduar të Bashkisë së Tiranës, një tjetër zhvillim ka ndodhur në drejtimin e institucionit. Eldi Hoxha, sekretari i Përgjithshëm i Bashkisë së Tiranës, ka dhënë dorëheqjen nga detyra.
Në vend të tij është komanduar sërish Alban Dokushi, një emër i njohur si i afërt me kryebashkiakun e Tiranës, Erion Veliaj.
Dokushi e mbante edhe më herët postin e sekretarit të Përgjithshëm, por u shkarkua nga Anuela Ristani rreth një muaj pas arrestimit të Veliajt. Vendimi u kundërshtua nga Dokushi, i cili e çoi çështjen në gjykatë.
Më 3 qershor, Gjykata e Apelit vendosi rikthimin e tij në detyrë. Moszbatimi i këtij vendimi gjyqësor ishte ndër argumentet e përdorura nga Veliaj kur vendosi t’i tërhiqte Ristanit delegimin e kompetencave.
Ndryshimet në Bashkinë e Tiranës vijojnë pas largimit të Ristanit, e cila dha dorëheqjen edhe nga posti i nënkryetares së Bashkisë, detyrë që e kishte mbajtur për rreth 11 vite.
Deri më tani, Veliaj nuk i ka deleguar kompetencat e tij te ndonjë prej nënkryetarëve të Bashkisë së Tiranës. Sipas vendimmarrjes së fundit, kryebashkiaku pritet të vijojë të ushtrojë kompetencat e tij dhe të firmosë vendimet nga burgu.
