Shqipëria hyn sot në ditën e 45-të të protestave qytetare, ndërsa organizatorët kanë bërë të ditur se mobilizimi do të vijojë edhe gjatë sezonit veror. Ashtu si në ditët e mëparshme, qytetarët u mblodhën edhe këtë mbrëmje përpara Kryeministrisë, duke kërkuar dorëheqjen e kryeministrit Edi Rama dhe ndryshime në sistemin politik.
Lëvizja, e cila nisi si një reagim kundër projektit turistik në zonën e Zvërnecit, është shndërruar në një protestë më të gjerë kundër qeverisë dhe klasës politike. Çdo mbrëmje, protestuesit marshojnë në rrugët e kryeqytetit, duke mbajtur pankarta, flamuj dhe slogane që janë kthyer në simbol të kësaj lëvizjeje.
Në protestën e një dite më parë, organizatorët ritheksuan se rezistenca nuk do të ndërpritet gjatë verës, duke deklaruar se tubimet do të vijojnë çdo ditë deri në shtator. Ata u bënë thirrje qytetarëve brenda dhe jashtë vendit që t’i bashkohen protestës dhe të mbështesin kauzën e tyre.
Gjatë protestës së 44-t, pjesëmarrësit brohoritën sërish parulla si “Rama në burg, Berisha në burg”, “Revolucion” dhe “Shqipëri e re”. Në podium folën aktivistë, përfaqësues të diasporës dhe qytetarë, të cilët kërkuan vazhdimin e protestës deri në plotësimin e kërkesave të saj.
Sipas organizatorëve, faza e verës konsiderohet vendimtare për ruajtjen dhe rritjen e presionit ndaj qeverisë. Për këtë arsye, ata kanë njoftuar se protestat do të zhvillohen çdo ditë, pa ndërprerje.m.k
