Zemërimi në Shqipëri nuk po zbehet ndaj projekteve të Trump Organization, të cilat rrezikojnë zona natyrore ku jetojnë, ndër të tjera, flamingot. Protestat po e vendosin kryeministrin Edi Rama në një pozitë gjithnjë e më të vështirë.
Që prej 31 majit, protesta të përditshme po denoncojnë dhënien e ishullit të Sazanit dhe gadishullit të Zvërnecit Trump Organization, e cila synon të ndërtojë aty një resort luksoz.
Protestuesit kundërshtojnë “duopolin” politik mes socialistëve dhe konservatorëve, të cilët i akuzojnë se, që nga rënia e komunizmit, kanë ngritur rrjete ndikimi në botën e biznesit dhe madje edhe në qarqe kriminale.
Edi Rama mbështetet te përkrahja e Brukselit dhe Uashingtonit për të ruajtur pushtetin, pavarësisht prirjes autoritare dhe korrupsionit të regjimit të tij, të njohura edhe nga Komisioni Evropian.
Edi Rama zgjedh provokimin. I sfiduar nga një valë protestash që vetëm sa është shtuar gjatë gjashtë javëve të fundit, kryeministri shqiptar këmbënguli ta priste personalisht reperin amerikan shumë të debatueshëm Kanye West, të cilit i janë ndaluar koncertet në shumicën e vendeve evropiane për shkak të deklaratave antisemite, islamofobe dhe admirimit të shprehur ndaj Adolf Hitlerit.
Madje, pak ditë para koncertit u bë e ditur se qeveria kishte shpenzuar 4.2 milionë euro për organizimin e tij, ndonëse fillimisht ishte prezantuar si një “koncert privat”, që nuk do t’u kushtonte asgjë taksapaguesve. Kjo shkaktoi reagimin e artistëve shqiptarë, të cilët protestuan të enjten para Ministrisë së Kulturës, duke kujtuar se kultura përfiton vetëm 0.1% të buxhetit të shtetit. Ministri Blendi Gonxhja i hodhi poshtë këto kritika, duke i cilësuar si “donkishoteske”.
Sipas qeverisë, koncerti do të nxiste turizmin duke e vendosur Shqipërinë në hartën botërore të eventeve të mëdha. Në realitet, biletat nuk u shitën në numrin e pritur dhe, për të mbushur 60 mijë vendet e stadiumit provizor “Eagle Stadium”, të ndërtuar pranë autostradës Tiranë-Durrës, qeveria transportoi me autobusë nxënës të shkollave të mesme dhe punonjës të administratës publike. Aktivistë të lëvizjes së majtë Bashkë arritën gjithashtu të hynin në stadium dhe të shpalosnin një pankartë ku shkruhej: “Edi Rama, Fuck Ye! Jep dorëheqjen!”
Ndërkohë, 10 deri në 15 mijë persona marshonin në Bulevardin “Dëshmorët e Kombit”, në qendër të Tiranës, për natën e 42-të radhazi. Koncerti nuk arriti ta largonte vëmendjen nga vala e zemërimit që ka përfshirë Shqipërinë.
Që prej 31 majit, protestat e përditshme kundërshtojnë dhënien e ishullit të Sazanit dhe gadishullit fqinj të Zvërnecit Trump Organization, konglomeratit familjar të drejtuar nga Ivanka Trump dhe bashkëshorti i saj Jared Kushner, të cilët planifikojnë të ndërtojnë një resort luksoz, duke rrezikuar zona të mbrojtura natyrore, përfshirë Lagunën e Nartës, strehë e flamingove.
“Revolucioni i flamingove rozë”
Që atëherë, protestuesit e “revolucionit të flamingove rozë” denoncojnë përpjekjet për ta shitur vendin në interes të një grushti oligarkësh, duke deklaruar se “Shqipëria nuk është në shitje”.
Shumica e protestuesve janë të rinj. Ata kërkojnë dorëheqjen e Edi Ramës, liderit të Partisë Socialiste, në pushtet që prej vitit 2013, por nuk kanë besim as te forca kryesore opozitare, Partia Demokratike e drejtuar nga Sali Berisha. Ata kërkojnë “një Shqipëri të re”, duke denoncuar rrjetet oligarkike që, sipas tyre, dominojnë vendin që nga rënia e komunizmit.
“Çdo parti ka mediat e veta dhe ka ndërtuar rrjete në botën e biznesit, madje edhe në qarqe kriminale. Pikërisht këtë duopol refuzojnë protestuesit”, shprehet eseisti Fatos Lubonja, ish-i burgosur politik gjatë diktaturës dhe një nga figurat kryesore të disidencës shqiptare.
Mbështetja ndërkombëtare si “garanci mbijetese”
Që nga fillimi i protestave, Edi Rama u është përgjigjur me përbuzje, duke u përpjekur t’i diskreditojë kundërshtarët e tij dhe duke i akuzuar se “manipulohen nga forca armiqësore ndaj Shqipërisë dhe Izraelit”, madje edhe nga Irani.
Këto akuza tingëllojnë ironike në një kohë kur vetë kryeministri sjell me shpenzime të mëdha një këngëtar të njohur për deklaratat e tij antisemite, si Kanye West. Megjithatë, sipas autorit, kjo shpjegohet me marrëdhëniet e ngushta që Rama mban me qeverinë e Benjamin Netanyahut.
“Edi Rama mbështetet te aleatët e tij ndërkombëtarë, evropianët dhe amerikanët. Kjo është garancia e tij e fundit për mbijetesë”, thotë Fatos Lubonja.
Sipas artikullit, prirja autoritare dhe korrupsioni i regjimit shqiptar janë të njohura në Bruksel, por Komisioni Evropian ka mbetur gjithmonë i rezervuar në kritikat e tij. Rama, i cili e ka rreshtuar politikën e jashtme të Shqipërisë me atë të Bashkimit Evropian, shihet si një kompromis i pranueshëm dhe, njësoj si homologu i tij serb Aleksandar Vuçiç, si garant i stabilitetit rajonal.
Dyshime mbi financimin e projekteve
Kryeministri, i cili nuk ka hequr dorë kurrë nga ambiciet e tij si artist pamor, pretendon se po krijon “fytyrën e re” të Shqipërisë. Ai kishte investuar shumë në promovimin e librit luksoz të arkitekturës The Albanian Files, botuar rreth dhjetë ditë më parë, ku paraqiten projektet më të mëdha urbanistike që po zhvillohen ose planifikohen në vend.
Megjithatë, opozita iu drejtua menjëherë SPAK-ut, Prokurorisë së Posaçme Kundër Korrupsionit dhe Krimit të Organizuar, duke ngritur pikëpyetje mbi financimin e këtyre projekteve.
“Studiot më të mëdha ndërkombëtare të arkitekturës janë përdorur për të legjitimuar mekanizma ekonomikë që bien ndesh me interesin publik”, deklaron Fatos Lubonja.
Ndërkohë, mobilizimi vazhdon të rritet, i forcuar edhe nga diaspora shqiptare që po kthehet në vend për pushimet verore.
Florian Haçkaj, zëdhënës i grupit “Diaspora për një Shqipëri të Lirë”, i njohur për debatet e tij me video ndaj kryeministrit Rama, ishte një nga figurat kryesore të tubimit të së shtunës. Ai tha se kishte ardhur nga Zvicra së bashku me familjen e tij dhe iu drejtua turmës me fjalët:
“Ju jeni heronjtë tanë. Mos lejoni t’ju frikësojnë. Koha e frikës ka marrë fund.” Përgaditi nga frëngjoshtja: droni.al
