Pas grumbullimit në Sheshin “Skënderbej”, mijëra protestues vijuan protestën para godinës së Kryeministrisë, në dizën e 43-të radhazi.
Bulevardi “Dëshmorët e Kombit” u mbush me protestues, të cilët mbanin pankarta dhe flamuj kombëtarë, ndërsa gjatë marshimit u dëgjuan thirrje si “Shqipëria kërkon revolucion” dhe “Edi Rama jep dorëheqjen”.
Organizatorët deklaruan se protesta synon të kërkojë largimin e kryeministrit Edi Rama dhe ndryshime në drejtimin politik të vendit. Gjatë tubimit, disa qytetarë morën fjalën, duke akuzuar qeverinë për përpjekje për të frenuar protestat dhe për të ushtruar presion ndaj pjesëmarrësve.
Një prej aktivisteve tha se protestuesit janë përballur me sulme verbale dhe tentativa intimidimi, por se kjo nuk do t’i ndalojë të vijojnë protestat.
“Qeveria na ka sulmuar që ditën e parë duke na quajtur agjentë, duke u marrë personalisht me ne, duke tentuar të intimidojë familjarët tanë. Por asnjë manovër nuk na largon nga e drejta jonë për të mbrojtur atdheun tonë”, u shpreh ajo.
Në fjalën e saj, aktivistja shtoi se protestat po mbështeten nga qytetarë të të gjitha moshave, duke theksuar pjesëmarrjen e të rinjve, grave dhe familjeve.
Protesta vijoi përpara godinës së Kryeministrisë, ndërsa pjesëmarrësit përsëritën thirrjet kundër qeverisë dhe kërkesat e tyre për ndryshim. Më pas protestuesit zhvilluan marshimin në rrugët e Tiranës. m.k
