Kryetari i Grupit Parlamentar të Partisë Demokratike, Gazment Bardhi, ka reaguar lidhur me fondin prej 4.2 milionë eurosh të miratuar nga qeveria për koncertin e Kanye West, duke deklaruar se kryeministri Edi Rama duhet të mbajë përgjegjësi penale për këtë vendim.
Në një reagim publik, Bardhi akuzon Ramën se ka përdorur fondet e shtetit në kundërshtim me ligjin, duke kujtuar se, kur ishte në opozitë, ai kishte denoncuar organizimin e tre eventeve për 100-vjetorin e Pavarësisë, me një vlerë totale prej 1 milion eurosh, si një rast abuzimi dhe korrupsioni.
Sipas Bardhit, 14 vite më vonë, i njëjti kryeministër ka miratuar 4.2 milionë euro për një koncert privat, pa procedurë ligjore dhe duke përdorur fonde që, sipas tij, duhet të shërbejnë vetëm për raste fatkeqësish natyrore ose situatash të jashtëzakonshme.
“Me standardin që ka vendosur vetë Edi Rama, ai duhet të përgjigjet penalisht për abuzimin me 4.2 milionë euro të taksapaguesve shqiptarë”, shprehet Bardhi.
Ai njoftoi se të hënën Grupi Parlamentar i Partisë Demokratike do të depozitojë një kallëzim penal në Prokurorinë e Posaçme (SPAK) ndaj kryeministrit Edi Rama dhe ministrit Blendi Gonxhja, duke kërkuar hetimin e tyre për atë që e cilëson si “abuzim flagrant me paratë e shqiptarëve”.
