Komiteti Parlamentar për Stabilizim-Asociim Shqipëri–Bashkimi Evropian nuk ka arritur të miratojë një rezolutë të përbashkët mbi procesin e integrimit europian të Shqipërisë, pasi Partia Socialiste dhe Partia Demokratike nuk gjetën dakordësi për përmbajtjen e dokumentit.
Mosmarrëveshjet mes mazhorancës dhe opozitës bënë që komiteti të mbyllte punimet pa një qëndrim të përbashkët me Parlamentin Europian.
Në një deklaratë për mediat, Partia Demokratike pretendoi se dështimi erdhi pasi Partia Socialiste refuzoi mbi 30 amendamente të propozuara nga opozita, të cilat, sipas selisë blu, kishin marrë edhe mbështetjen e eurodeputetëve.
Përplasjet politike u reflektuan edhe gjatë diskutimeve në komitet, ku kryetarët e grupeve parlamentare, Taulant Balla dhe Gazment Bardhi, paraqitën qëndrime të ndryshme mbi zhvillimet politike dhe institucionale në Shqipëri.
Përfaqësuesit e shumicës vlerësuan ecurinë e procesit të integrimit, duke theksuar progresin në negociatat me Bashkimin Evropian dhe avancimin në hapjen e kapitujve negociues.
Nga ana tjetër, opozita ngriti shqetësime për korrupsionin, funksionimin e shtetit të së drejtës dhe çështje që lidhen me afera korruptive të qeverisë, duke argumentuar se këto mbeten pengesa për rrugën europiane të vendit.
