Kryeministri Edi Rama ka reaguar sërish për debatin që ka shoqëruar mbështetjen financiare të qeverisë për koncertin e Kanye West, që pritet të mbahet më 11 korrik në Tiranë.
Në një postim në rrjetet sociale, Rama mbrojti vendimin për dhënien e 4 milionë eurove kompanisë organizatore, duke thënë se fondi u akordua në minutën e fundit për të garantuar zhvillimin e koncertit dhe për të mos dëmtuar imazhin e Shqipërisë përballë mijëra vizitorëve të huaj.
Sipas kreut të qeverisë, rreth 25 mijë të huaj nga 80 shtete kanë blerë bileta për koncertin, ndërsa aktiviteti pritet të sjellë jo më pak se 100 milionë euro të ardhura për ekonominë shqiptare.
“4 milionë euro në minutën e fundit, për të mos turpëruar Shqipërinë në sytë e afro 25 mijë të huajve nga 80 shtete që kanë blerë me kohë biletat për Kanye West; për të mos humbur një mundësi fantastike promovimi të Shqipërisë turistike dhe për të stimuluar ekonominë. Nga ky koncert ne llogarisim jo më pak se 100 milionë euro të ardhura. Mjafton të shihet shpërthimi i rezervimeve në booking.com për fundjavën, për të krijuar një ide të përfitimit ekonomik për familjet, biznesin dhe arkën e shtetit”, shkruan Rama.
Kryeministri hodhi poshtë akuzat se fondet për koncertin janë marrë në dëm të sektorit të shëndetësisë apo kategorive në nevojë, duke theksuar se qeveria ka miratuar së fundmi fonde shtesë për ilaçet e të sëmurëve me kancer, pajisjet mjekësore, personat me aftësi të kufizuara, startup-et dhe pensionistët.
Në reagimin e tij, Rama sulmoi edhe kritikët e këtij vendimi, të cilët i quajti “sorra dhe korba”, duke i akuzuar për manipulim dhe përpjekje për të penguar zhvillimin e vendit.
“Duan të ndalin dhe të kthejnë mbrapa Shqipërinë. Me dhunën e arbitraritetit, të sharjeve, të shpifjeve, të akuzave dhe kërcënimeve për këdo që mendon ndryshe prej tyre. Ta harrojnë! Shqipëria nuk ndalet dhe nuk ka asnjë shans të kthehet mbrapsht”, përfundon postimi i kryeministrit.
Vendimi i qeverisë për të financuar me 4 milionë euro organizimin e koncertit ka shkaktuar debat publik dhe reagime nga opozita, e cila pretendon se fondet po përdoren për të kompensuar biletat e pashitura të një aktiviteti privat.
