Një i ri që mori fjalën në protestën e 39-të qytetare në Tiranë kritikoi qeverinë për financimin e festivalit muzikor, duke e cilësuar atë si një përpjekje për të larguar vëmendjen nga problemet me të cilat përballen qytetarët.
Ai e quajti organizimin e festivalit një “kurth të mirëorganizuar” dhe kundërshtoi përdorimin e 4 milionë eurove nga fondi i emergjencës, ndërsa, sipas tij, në sistemin shëndetësor mungojnë edhe ilaçet bazë.
“Kur ne nuk kemi një paracetamol në spital, ne harxhojmë 4 milionë euro nga fondi i emergjencës për një festival. I bëjmë thirrje zotit kryeministër, na furnizo me ilaçe, sepse ne nuk na kërcehet, ne na protestohet”, u shpreh ai.
Në fjalën e tij, protestuesi u bëri thirrje qytetarëve të mos shpërqendrohen nga kauza e protestës, duke deklaruar se do të vijojnë tubimet e përditshme.
“Ne do të mblidhemi siç jemi mbledhur për 39 ditë këtu, sepse nuk do të biem viktimë e shprehjes ‘kur fshati digjet, vajza e mirë krihet’. Ne, zoti kryeministër, kur Shqipëria digjet, ne luftojmë”, tha ai.
Në përfundim, i riu u bëri thirrje protestuesve të vazhdojnë rezistencën, ndërsa ironizoi organizimin e festivalit, duke thënë se “koncertin e vërtetë” qytetarët po e zhvillojnë çdo ditë në shesh, përmes protestës.
