Kryetari i Partisë Demokratike, Sali Berisha, ka deklaruar se qeveria e drejtuar prej tij kishte hartuar një strategji për zhvillimin e bregdetit shqiptar, e cila sipas tij u braktis pas ardhjes në pushtet të Edi Ramës.
Sipas Berishës, hapi i parë ishte angazhimi i një kompanie britanike, e cila kreu një studim të plotë të vijës bregdetare shqiptare. Ai tha se studimi nuk përcaktonte zonat ku duhej të ndërtohej, por identifikonte zonat ku ndërtimi nuk duhej të lejohej, me qëllim mbrojtjen e bregdetit.
Në vijim, sipas kreut të PD-së, zhvillimi i zonave bregdetare iu la në dorë autoriteteve vendore. Ai solli si shembull Bashkinë e Himarës, ku, sipas tij, kryebashkiaku i asaj kohe, Vasil Bollano, kontraktoi një kompani greke për hartimin e planeve të zhvillimit të komuniteteve lokale.
Berisha vlerësoi punën e kësaj kompanie, duke deklaruar se, nëse projektet e saj do të ishin zbatuar, bregdeti shqiptar do të kishte një zhvillim krejtësisht tjetër dhe do të ishin shmangur, sipas tij, dëmtimet mjedisore që shihen sot.
Sipas Berishës, situata ndryshoi në vitin 2014, kur qeveria e Edi Ramës, sipas tij, hoqi dorë nga studimi britanik dhe nga planet vendore, duke i zëvendësuar me Planin e Integruar të Zhvillimit të Bregdetit.
Ai akuzoi kryeministrin se ky plan i hapi rrugë ndërtimeve pa kriter dhe favorizoi interesa private në zonat bregdetare.
Në deklaratën e tij, Berisha iu referua edhe një publikimi që e quajti “Libri i Kuq”, për të cilin ngriti pikëpyetje mbi mënyrën e hartimit të projekteve, financimin e tyre, dokumentacionin e pronësisë dhe kostot e paguara.
Në përfundim, kreu i Partisë Demokratike u bëri thirrje institucioneve ndërkombëtare të zbatimit të ligjit, përfshirë Interpolin, Europolin dhe Eurojust, të hetojnë, sipas tij, projektet dhe investimet e realizuara në bregdetin shqiptar. a.b
