.
Bulevardi u mbush plot sot në ditën e 35 të protestës, me qytetarë nga Tirana dhe qytete të ndryshme të vendit, ndërsa pjesë e tubimit u bënë edhe shqiptarë të ardhur nga diaspora. Gjatë protestës u kërkua dorëheqja e kryeministrit Edi Rama, ndërsa e sotmja është një nga protestat me pjesëmarrjen më të madhe që nga nisja e lëvizjes.
Në fjalën e saj, një protestuese përshëndeti pjesëmarrjen e diasporës, duke u shprehur se shqiptarët jashtë vendit janë kthyer për të mbështetur kërkesat e qytetarëve.
“Mirëseerdhët, diasporë. Sot në fytyrat tuaja shoh Shqipërinë e re, pa autokratë. Jemi këtu që nënat tona të mos na përcjellin më me lot në sy. Nuk ikim më, ikni ju. Jam këtu me besimin se në Shqipërinë e re do të ketë një drejtësi që heton edhe Edi Ramën, edhe oligarkët, edhe autokratët”, u shpreh ajo.
Një nga momentet më të spikatura të tubimit ishte edhe fjala e një të reje, e cila tha se është e vetmja vajzë e proceduar penalisht pas protestave të fundit.
Ajo mohoi akuzat e ngritura ndaj saj, duke deklaruar se gjatë protestës nuk kishte ushtruar dhunë dhe se mbante në duar vetëm telefonin.
“Unë jam e vetmja vajzë e proceduar në protestën paqësore. Më akuzojnë për sulm ndaj policisë dhe shkatërrim prone, kur kam pasur në duar vetëm telefonin”, deklaroi ajo.
Protestuesja u shpreh se procedimet penale nuk do ta ndalin rezistencën qytetare, ndërsa i bëri thirrje autoriteteve të lirojnë protestuesit e arrestuar.
“Ne jemi gjenerata Z. Nuk heshtim përballë padrejtësive, nuk na e mbyllni dot gojën. Lironi çunat!”, tha ajo, mes brohoritjeve të pjesëmarrësve.
Në përfundim të fjalës së saj, e reja deklaroi se protestat do të vijojnë deri në largimin e qeverisë, ndërsa turma iu përgjigj me duartrokitje dhe thirrje mbështetëse.a.b
