Kryetari i Partisë Demokratike, Sali Berisha, deklaroi se Partia Popullore Evropiane (PPE) ka miratuar me unanimitet raportin e misionit faktmbledhës për Shqipërinë dhe, sipas tij, në rezolutën shoqëruese mbështetet krijimi i një qeverie teknike ose kujdestare për organizimin e zgjedhjeve të lira dhe të ndershme.
Në një deklaratë për mediat, Berisha tha se raporti është hartuar pas vizitës së delegacionit të PPE-së në Shqipëri gjatë muajit shkurt dhe e cilësoi atë si “pasqyrën më besnike” të situatës politike në vend.
Sipas kreut të PD-së, raporti e paraqet Shqipërinë si një shtet të kapur nga krimi i organizuar, oligarkët dhe kartelet e drogës, ndërsa ngre shqetësime për procesin zgjedhor, përdorimin e burimeve shtetërore në zgjedhje, korrupsionin dhe funksionimin e institucioneve.
Berisha u shpreh se dokumenti i referohet edhe raporteve të organizmave ndërkombëtarë për zgjedhjet dhe evidenton, sipas tij, shkelje të standardeve demokratike, përfshirë kufizimin e të drejtave të opozitës në Parlament dhe moszbatimin e vendimeve të Gjykatës Kushtetuese.
Ai deklaroi gjithashtu se raporti trajton çështje që lidhen me luftën kundër korrupsionit, duke përmendur me emër zëvendëskryeministren Belinda Balluku dhe drejtoreshën e AKSHI-t.
Berisha tha se risia kryesore e raportit dhe rezolutës së PPE-së është mbështetja për krijimin e një qeverie teknike ose kujdestare, me argumentin se vetëm në këtë mënyrë mund të garantohen zgjedhje të lira dhe të ndershme në Shqipëri.
Kreu i Partisë Demokratike e cilësoi këtë si një arritje të rëndësishme për opozitën dhe për qytetarët shqiptarë. a.b
