Njëmbëdhjetë organizata dhe shoqata shqiptare me bazë në Mbretërinë e Bashkuar i kanë drejtuar një letër të hapur Qeverisë dhe Kuvendit të Shqipërisë, ku shprehin mbështetjen për protestat qytetare që po zhvillohen prej më shumë se një muaji dhe dënojnë dhunën e ushtruar ndaj protestuesve paqësorë.
Nismës i është bashkuar edhe shkrimtarja Lea Ypi, e cila ka publikuar letrën në rrjetet sociale.
Në reagimin e tyre, organizatat vlerësojnë se protestat përfaqësojnë një shoqëri civile gjithnjë e më të ndërgjegjshme dhe të organizuar, duke i cilësuar ato si një shprehje të demokracisë dhe të së drejtës së qytetarëve për të kërkuar llogari nga institucionet.
Sipas tyre, në protesta marrin pjesë të rinj, prindër, profesionistë dhe studiues që kërkojnë mbrojtjen e pasurive natyrore, hapësirave publike dhe të drejtës për t’u dëgjuar nga institucionet shtetërore.
Në letrën e hapur, organizatat dënojnë çdo formë dhune, frikësimi apo represioni ndaj protestuesve paqësorë dhe i bëjnë thirrje qeverisë të marrë në konsideratë kërkesat e ngritura nga lëvizja qytetare.
Dokumenti përmbledh katër kërkesa kryesore drejtuar institucioneve shqiptare:
- transparencë të plotë për ligjet, vendimet dhe kontratat që lidhen me mbrojtjen e mjedisit dhe pasurive natyrore;
- llogaridhënie për shitjen ose dhënien me koncesion të pasurive shtetërore, përmes konsultimit publik dhe mbikëqyrjes parlamentare;
- mbrojtjen e interesit publik si parim themelor në politikat e zhvillimit ekonomik;
- nisjen e një dialogu të mirëfilltë me përfaqësuesit e shoqërisë civile dhe protestuesit.
Letra është firmosur nga UKAP Foundation, Kosovar Albanian Youth Against Violence, British Albanian Culture & Arts Association, Edinburgh University Albanian Society, Albanian Book Lovers Culture Club, Cambridge Uni Albanian Society, LSE Albanian Society, Diasporas Speaking, UCL Albanian Society, Successful Mothers dhe Gjurmë Iliriane.
