Kreu i SPAK, Klodian Braho, deklaroi se nuk përjashtohet mundësia që Prokuroria e Posaçme t’i drejtohet sërish Kuvendit me një kërkesë për heqjen e imunitetit të zëvendëskryeministres Belinda Balluku, duke theksuar se çdo vendimmarrje do të bazohet në ligj dhe në provat e mbledhura gjatë hetimeve.
Gjatë raportimit në Komisionin e Ligjeve, Braho iu përgjigj interesimit të deputetit Oerd Bylykbashi, i cili e pyeti nëse SPAK po shqyrton paraqitjen e një kërkese të re ndaj Ballukut.
Sipas kreut të SPAK, hetimet kanë vijuar edhe pas refuzimit nga Kuvendi të kërkesës së mëparshme dhe puna e Prokurorisë është zhvilluar në përputhje me ligjin.
“Nuk do të kishte çështje nëse nuk do të kishte shkelje të ligjit. Qëndrimi i Prokurorisë është i qartë dhe po aq e qartë është edhe mënyra se si hetimet kanë vijuar edhe pas refuzimit të kërkesës së mëparshme. Faktet tregojnë se Prokuroria ka bërë punën e saj”, u shpreh Braho.
Ai theksoi se procedimi është ende në fazën e hetimit dhe se është herët për të përcaktuar nëse do të paraqitet një kërkesë e re në Kuvend.
“Nuk mund të them sot nëse do të ketë apo jo një kërkesë tjetër. Ajo që mund të garantoj është se çdo vendim do të merret në përputhje me ligjin, mbi bazën e provave që do të sigurohen gjatë hetimit, duke marrë në konsideratë edhe arsyetimin e Kuvendit për rrëzimin e kërkesës së mëparshme”, deklaroi kreu i SPAK.
