Kongresmeni amerikan Joe Wilson ka propozuar një projektligj që kërkon hetimin nga strukturat amerikane të inteligjencës mbi lidhjet e mundshme të qeverisë shqiptare me trafikun ndërkombëtar të kokainës.
Përmes një amendamenti të depozituar dy javë më parë në Kongresin Amerikan, Wilson kërkon që agjencitë përkatëse të përgatisin një raport mbi shkallën e narkotrafikut në Shqipëri dhe rolin e mundshëm të qeverisë shqiptare në lehtësimin ose mundësimin e këtij aktiviteti.
Sipas raportimeve, propozimi ka kaluar Komisionin e Rregullave dhe Komisionin e Ligjeve në Dhomën e Përfaqësuesve dhe pritet të shqyrtohet në seancë plenare.
Amendamenti parashikon që brenda 180 ditëve nga hyrja në fuqi e ligjit, Sekretari amerikan i Shtetit, në koordinim me Drejtorin e Inteligjencës Kombëtare, t’u paraqesë komiteteve përkatëse të Kongresit një raport të klasifikuar, të hartuar në përputhje me mbrojtjen e burimeve dhe metodave të inteligjencës.
Raporti, sipas amendamentit, duhet të shqyrtojë:
- shkallën e narkotrafikut në Shqipëri;
- rolin e qeverisë së Shqipërisë në lehtësimin ose mundësimin e këtij narkotrafiku.
Joe Wilson është anëtar i Komisionit të Punëve të Jashtme dhe i Komisionit të Shërbimeve të Armatosura në Dhomën e Përfaqësuesve të SHBA-së. Ai bashkëkryeson gjithashtu Grupin e Miqësisë Shqipëri-SHBA së bashku me kongresmenin Robert Aderholt. hashtag.al
