Prestigjiozja gjermane “Der Spiegel” i ka kushtuar një artikull protestave që po zhvillohen në Shqipëri kundër qeverisë së kryeministrit Edi Rama dhe projektit të investimit të planifikuar në zonën e mbrojtur të Nartës.
Sipas medias gjermane, protesta e zhvilluar në Tiranë u shoqërua me përplasje mes protestuesve dhe policisë, pasi qytetarët tentuan të bllokonin godinën e Parlamentit. Gjatë tensioneve u hodhën vezë dhe miell, ndërsa policia përdori mjete me ujë nën presion dhe sprej me piper për të shpërndarë turmën. Si pasojë pati të arrestuar dhe të plagosur.
“Der Spiegel” shkruan se zemërimi i protestuesve tashmë shkon përtej kundërshtimit të projektit të ndërtimit në zonën e mbrojtur të Nartës dhe është shndërruar në një lëvizje më të gjerë kundër qeverisë së Edi Ramës.
Artikulli ndalet edhe te projekti i investimit të kompanisë së Jared Kushner, dhëndrit të presidentit amerikan Donald Trump, i cili parashikon ndërtimin e hoteleve luksoze, vilave dhe objekteve rekreative në gjirin e Zvërnecit dhe në ishullin e Sazanit.
Sipas revistës gjermane, organizatat mjedisore paralajmërojnë se projekti mund të shkaktojë dëme të parikuperueshme në ekosistemin e deltës së Vjosës, habitat i flamingove, çafkave dhe shumë specieve të tjera të shpendëve. Për këtë arsye, thuhet në artikull, mijëra qytetarë protestojnë prej më shumë se një muaji në Tiranë, ndërsa lëvizja është quajtur “Revolucioni i Flamingove”, me flamingon që është kthyer në simbol të saj.
“Der Spiegel” thekson se protesta e së enjtes u zhvillua për herë të parë gjatë ditës dhe kishte si objektiv bllokimin e Parlamentit. Duke iu referuar të dhënave të policisë, të publikuara nga Agjencia Telegrafike Shqiptare, media gjermane shkruan se 18 persona u shoqëruan, ndërsa 15 efektivë policie dhe katër protestues morën ndihmë mjekësore pas përplasjeve.
Artikulli vëren gjithashtu se protestuesit kërkojnë dorëheqjen e kryeministrit Edi Rama dhe shprehin dyshime se mbështetja e tij për projektin lidhet me korrupsionin. Nga ana tjetër, Rama ka deklaruar se ende nuk është dhënë leja e ndërtimit, megjithëse, sipas “Der Spiegel”, në fund të muajit maj makineritë e ndërtimit u shfaqën në zonën ku parashikohet të zbatohet projekti, çka nxiti nisjen e protestave që vijojnë edhe sot.
