Është ndarë nga jeta në moshën 83-vjeçare pedagogu, studiuesi dhe kritiku i njohur i letërsisë shqipe, Ali Xhiku. Lajmi u bë i ditur nga Akademia e Shkencave e Shqipërisë, e cila vlerësoi kontributin e tij të gjatë në fushën e studimeve letrare dhe arsimit universitar.
Për dekada me radhë, Ali Xhiku ishte pjesë e stafit akademik të Fakultetit të Historisë dhe Filologjisë, ku ushtroi detyrën e pedagogut, si edhe mbajti funksionet e zv.dekanit dhe dekanit. Gjatë karrierës së tij ai kontribuoi në formimin e brezave të studentëve dhe në zhvillimin e kritikës dhe historiografisë së letërsisë shqiptare.
Një vit më parë, profesori u vlerësua me çmimin “Autori i librit më të mirë studimor” në Panairin e 28-të të Librit për veprën “Faqeve të historiografisë shqiptare”, botuar nga Onufri, një studim që trajton teorinë dhe metodologjinë e historisë së letërsisë shqipe.
Ndër botimet më të njohura të tij janë edhe “Letërsia shqipe si polifoni”, “Duke lexuar letërsinë e traditës”, “Nga romantizmi drejt rrjedhave të realizmit”, “Përmes mendimit historiko-letrar të Çabejt” dhe “Sprovë për një tjetër histori të letërsisë shqipe”.
Ali Xhiku ka drejtuar gjithashtu Institutin e Kulturës Popullore pranë Akademisë së Shkencave, duke lënë një kontribut të rëndësishëm në studimin e kulturës dhe letërsisë shqiptare. Në punimet e tij ai mbrojti idenë se historiografia letrare duhet të mbështetet mbi analizën e teksteve dhe zhvillimeve reale historike, larg ndikimeve ideologjike, ndërsa përmes një qasjeje krahasimtare e vendosi letërsinë shqipe në dialog me traditat letrare evropiane.
Me ndarjen nga jeta të Ali Xhikut, studimet albanologjike dhe komuniteti akademik shqiptar humbasin një prej emrave më të spikatur të kritikës dhe historiografisë letrare.a.b
