Në ditën e 32-të të protestave qytetare, përfaqësues të shoqërisë civile dhe organizatorë të protestës janë paraqitur pranë godinës së Prokurorisë së Posaçme (SPAK), ku kanë dorëzuar librin “Albanian Files”, të cilin e cilësuan si një provë që, sipas tyre, dokumenton shkelje të rënda të kryera gjatë qeverisjes së kryeministrit Edi Rama.
Sipas protestuesve, libri përmban të dhëna për 523 projekte ndërtimi, një pjesë e të cilave janë realizuar ose parashikohen të ndërtohen në zona të mbrojtura dhe hapësira publike. Ata pretendojnë se dokumentacioni tregon se ndryshimet ligjore, përfshirë ligjin 21/24, janë bërë për t’u shërbyer interesave të investitorëve të caktuar.
Si shembull u përmendën projektet në Zvërnec, të cilat, sipas tyre, datojnë që në vitin 2022, përpara miratimit të ndryshimeve ligjore. Protestuesit ngritën gjithashtu pretendime për konflikt interesi, duke argumentuar se kryeministri Edi Rama, në cilësinë e kryetarit të Këshillit Kombëtar të Territorit, ka rol në miratimin e projekteve të përfshira në këtë dokument.
Përfaqësuesit e protestës njoftuan se, së bashku me librin, kanë depozituar edhe një kallëzim penal ndaj kryeministrit Edi Rama, si dhe kanë paralajmëruar se në ditët në vijim do të dorëzojnë një kallëzim më të zgjeruar, ku, sipas tyre, do të përfshihen edhe zyrtarë të tjerë, arkitektë dhe biznesmenë të lidhur me projektet.
Në deklaratën e tyre, ata theksuan se mbështesin punën e deritanishme të SPAK-ut, por kërkuan që hetimet të shtrihen edhe mbi projektet e përfshira në librin “Albanian Files”.
Organizatorët përsëritën gjithashtu kërkesat e tyre politike, duke deklaruar se kushti i panegociueshëm mbetet dorëheqja e kryeministrit Edi Rama. Ata kërkuan krijimin e një qeverie teknike tranzitore, ndryshime në Kodin Zgjedhor, anulimin e ligjit për investitorët strategjikë, shfuqizimin e paketës së maleve dhe ndryshime të tjera ligjore që, sipas tyre, do të garantonin zgjedhje të lira dhe forcimin e shtetit të së drejtës.
