Protesta e 32-të qytetare para Kryeministrisë është shoqëruar me thirrje të reja nga pjesëmarrësit, të cilët kanë bërë apel për një angazhim më të madh qytetar dhe kanë kërkuar mbështetje edhe nga përfaqësitë diplomatike në Shqipëri.
Gjatë fjalës së tij, një pedagog pjesëmarrës në protestë u bëri thirrje qytetarëve të dalin masivisht në tubime, duke e cilësuar momentin si vendimtar për të ardhmen e vendit.
Ai iu drejtua gjithashtu ambasadave të vendeve të Bashkimi Evropian dhe Shtetet e Bashkuara në Shqipëri, duke u kërkuar, sipas deklaratës së tij, të ndihmojnë në largimin e qeverisë, pasi pretendoi se pasojat e keqqeverisjes nuk prekin vetëm Shqipërinë, por edhe partnerët ndërkombëtarë.
Protestuesi akuzoi qeverinë e kryeministrit Edi Rama për kriminalizimin e shoqërisë dhe degradimin e sistemit shëndetësor e arsimor, duke argumentuar se këto zhvillime nxisin emigracionin dhe kriminalitetin.
“Është e ardhmja juaj, ndaj ngrihuni dhe ta fshijmë nga faqja e dheut këtë sistem. Jam një njeri që kam lindur në sheshet e lirisë në përballje me diktaturat dhe do të vdes po në sheshet e lirisë. Ambasadat e BE dhe SHBA, na ndihmoni të heqim qafe këtë qeverisje që po kriminalizon dhe dëbon shoqërinë. Shkatërrimi i sistemit shëndetësor dhe arsimor nuk sjell asgjë të mirë, mbjell vetëm krim dhe bela edhe për BE-në dhe SHBA-në”, u shpreh ai gjatë protestës.
Gjatë tubimit, një tjetër protestues njoftoi se të enjten, në orën 10:00, do të zhvillohet një protestë përpara Parlamentit, si reagim ndaj, sipas tij, dhunës së ushtruar nga policia ndaj protestuesve më 30 qershor. Ai u bëri thirrje qytetarëve të marrin pjesë masivisht, ndërsa iu drejtua edhe efektivëve të Policisë, duke deklaruar se ata duhet të mbajnë përgjegjësi për veprimet e tyre.
“Dje forcat e policisë kanë ushtruar dhunë të neveritshme, prandaj nesër të gjithë në orën 10:00 te Kuvendi. Policët të kenë kujdes sepse qytetarët kanë në dorë t’ju pushojnë nga puna dhe t’ju çojnë në burg. Parlamenti është i yni, jo i atyre. Ju nuk na përfaqësoni, nuk përfaqësoni diasporën dhe aspiratat tona. Nesër te Kuvendi do t’i ndalojmë të futen”, deklaroi ai.
Një aktivist tjetër bëri thirrje që protestuesit të paraqiten para Parlamentit me miell dhe vezë, duke e cilësuar këtë si një veprim simbolik për “gatimin e brumit të demokracisë dhe republikës së re”.
“Nesër merrni vezë dhe miell dhe të gatuajmë brumin e demokracisë. Duhet të ndërtojmë republikën e re me zgjedhje të ndershme dhe votë të lirë. Duam një republikë të qytetarëve, ku qytetari të jetë në qendër. Duhet t’i rikthejmë vendit referendumin, prandaj duhet të bëjmë një rrethim demokratik të Parlamentit. Mos kini frikë, sepse jemi për një kauzë të drejtë. Nesër para Parlamentit”, u shpreh ai.
