Byroja Kombëtare e Hetimit ka arrestuar në Durrës Adi Çobo Bazholin, i njohur edhe me nofkën “Bisha”, i cili ishte shpallur në kërkim nga autoritetet italiane në kuadër të hetimeve për dosjen “Ura”.
Sipas burimeve nga hetimi, operacioni është kryer nga strukturat e BKH-së, pa pjesëmarrjen e Policisë së Shtetit.
Sipas hetimeve të autoriteteve italiane dhe materialeve të referuara nga SPAK, Çobo Bazholi dyshohet se kishte një rol drejtues në organizatën kriminale, duke siguruar dhe dërguar nga jashtë sasi të mëdha heroine dhe kokaine drejt Italisë. Hetimet pretendojnë se ai koordinonte nga Shqipëria aktivitetin e anëtarëve të tjerë të grupit, i përbërë nga shtetas shqiptarë dhe italianë.
Arrestimi vjen në një kohë kur kreu i SPAK, Klodian Braho, ka deklaruar në Komisionin Parlamentar se po shqyrtohet ngritja e një strukture të posaçme brenda Prokurorisë së Posaçme për lokalizimin dhe kapjen e personave në kërkim, duke argumentuar se në disa raste rezultatet e deritanishme kanë qenë të pamjaftueshme.
Detaje të tjera mbi operacionin dhe masat procedurale pritet të bëhen publike nga autoritetet në vijim.m.k
