Protesta e qytetarëve para Kuvendit të Shqipërisë është përshkallëzuar këtë të martë, ndërsa brenda godinës po zhvillohej seanca plenare. Momenti më i tensionuar u shënua kur pranë protestuesve kaloi automjeti i zëvendëskryeministres Albana Koçiu.
Sipas informacioneve nga vendngjarja, protestuesit i bllokuan rrugën automjetit të Koçiut, ndërsa efektivët e Policisë ndërhynë duke i shtyrë për të krijuar kalimin. Pasi policia arriti të hapte rrugën, qytetarët goditën me vezë automjetin e zëvendëskryeministres gjatë largimit.
Më herët, protestuesit kishin hedhur vezë edhe në drejtim të automjeteve të deputetëve të parkuara pranë Kuvendit. Gjatë gjithë protestës u dëgjuan thirrje kundër deputetëve dhe mazhorancës, si “Turp” dhe “Parlament analfabet”.
Protesta vijoi për disa orë përpara godinës së Kuvendit, ndërsa policia u kërkoi protestuesve të lironin rrugën. Ata refuzuan, duke deklaruar se nuk do t’ua lironin kalimin zyrtarëve qeveritarë.
“Nuk ua lirojmë rrugën hajdutëve dhe analfabetëve. Kjo është tokë publike, e jona, nuk e lirojmë”, u shpreh një nga protestuesit, ndërsa turma brohoriste slogane kundër patronazhistëve.
Situata u tensionua edhe më tej kur policia shoqëroi disa protestues, pasi u hodhën vezë në drejtim të automjeteve të deputetëve dhe anëtarëve të kabinetit qeveritar. Mes të shoqëruarve ishte edhe Dritan Goxhaj.
Pas përplasjes me efektivët, protestuesit vendosën ta zhvendosin tubimin drejt Drejtorisë së Policisë së Tiranës, duke kërkuar lirimin e të shoqëruarve. “Lironi protestuesit”, ishte një nga thirrjet kryesore të tyre.
Kjo është dita e 31-të e protestave qytetare në Tiranë, ku pjesëmarrësit kërkojnë dorëheqjen e kryeministrit dhe të qeverisë së tij.
