Nga Agnes Rotivel, LA CROIX
Prej një muaji tashmë, shqiptarët protestojnë në rrugët e Tiranës për të denoncuar një projekt turistik luksoz të dhëndrit të Donald Trump, Jared Kushner, dhe bashkëshortes së tij, Ivanka Trump, në një nga zonat e mbrojtura të vendit. Ata akuzojnë kryeministrin dhe qeverinë për korrupsion.
Zemërimi në Shqipëri nuk është shuar ende.
Që kur, në fund të muajit maj, u zbuluan telat me gjemba në plazhet e Zvërnecit, rreth 150 kilometra në jugperëndim të Tiranës, shqiptarët nuk kanë reshtur së marshuari në rrugët e kryeqytetit për të protestuar kundër projekteve turistike të Ivanka Trump dhe Jared Kushner në ishullin e Zvërnecit.
Të shtunën në mbrëmje, disa mijëra protestues marshuan në kolonë, duke mbajtur figura gjigante të flamingove rozë dhe pankarta ku lexohej: “Resign” (“Jep dorëheqjen”).
Megjithëse kjo çështje mbetet e paqartë në shumë aspekte, çifti pretendon se ka siguruar dokumentet e pronësisë për tokën ku do të ndërtohej një pjesë e kompleksit hotelier.
Kjo ndodh pavarësisht se bëhet fjalë për një zonë të mbrojtur. Ata mbështeten në një ligj të miratuar në shkurt të vitit 2024, i cili lejon zhvillimin e projekteve të tilla edhe në zona me ndjeshmëri të lartë mjedisore.
I ndodhur rreth dhjetë kilometra nga Vlora, ishulli i Zvërnecit lidhet me bregun përmes një moli të gjatë prej druri që kalon mbi ujërat e qeta të lagunës.
Ishulli, i mbuluar pothuajse tërësisht me pyll pishe, si dhe laguna përreth, janë pjesë e peizazhit të mbrojtur Vjosa–Narta, një zonë e njohur për biodiversitetin e pasur.
Ky ekosistem strehon shumë lloje shpendësh, ndër to flamingot rozë dhe pelikanët kaçurrelë, dy specie të rrezikuara që shumohen në lagunën e Nartës.
Një kryeministër i konsumuar nga pushteti dhe akuzat për korrupsion
Që nga fillimi i protestave, kryeministri Edi Rama nuk ka reshtur së ironizuari protestuesit. Në një intervistë për Financial Times, ai u kërkoi atyre “të shkojnë të q*en”.
Që nga fillimi i qershorit, të paktën njëqind protestues janë vënë nën hetim, të akuzuar për bllokim të qarkullimit, prishje të rendit publik, si edhe organizim e pjesëmarrje në tubime të paligjshme.
Megjithatë, zemërimi i protestuesve nuk lidhet vetëm me projektin e familjes Kushner, por edhe me qeverisjen e kryeministrit Edi Rama, i cili është në pushtet që nga viti 2013.
Ata e konsiderojnë atë përgjegjës për rritjen e kostos së jetesës, korrupsionin, problemet në sistemin shëndetësor, pensionet e ulëta dhe mungesën e perspektivës për të rinjtë, të cilët prej vitesh po largohen masivisht nga Shqipëria.
Nga ana tjetër, familja Kushner nuk është në përpjekjen e saj të parë për investime në Ballkan.
Në Serbi, në dhjetor të vitit 2025, kompania Affinity Partners, në pronësi të Jared Kushner, u detyrua të tërhiqte projektin për ndërtimin e një hoteli luksoz mbi rrënojat e ish-selisë së ushtrisë jugosllave në Beograd.
Kompleksi ishte bombarduar në vitin 1999 gjatë fushatës ajrore të NATO-s për t’i dhënë fund luftës në Kosovë. Projekti u braktis pas protestave publike dhe u shoqërua me akuza për korrupsion dhe përdorim dokumentesh të falsifikuara.
