Kryetari i Grupit Parlamentar të Partisë Demokratike, Gazment Bardhi, i ka bërë thirrje publike Prokurorisë së Posaçme që t’i drejtohet Kuvendit me kërkesën për heqjen e imunitetit dhe arrestimin e ish-zëvendëskryeministres Belinda Balluku.
Në një deklaratë, Bardhi tha se SPAK ndodhet përballë një “testi vendimtar të besueshmërisë”, duke argumentuar se pozita penale e Ballukut është rënduar pas dyshimeve të reja për korrupsion pasiv dhe pastrim parash, të bëra publike më 4 qershor.
Deputeti demokrat iu referua njoftimit të SPAK-ut për sekuestrimin e një vile në Dhërmi, për të cilën Prokuroria dyshon se është përfituar si ryshfet dhe më pas është fshehur përmes kontratave fiktive.
Sipas Bardhit, Prokuroria duhet të zbatojë të njëjtin standard që, sipas tij, përdori në dhjetor të vitit 2025, kur kërkoi arrestimin e Ballukut pas rëndimit të pozitës së saj penale.
Ai ngriti gjithashtu pyetje nëse ka pasur ndërhyrje politike në këtë proces, duke pyetur: “A ka ndërhyrë Edi Rama te drejtuesi i ri i Prokurorisë së Posaçme për të shtyrë, të paktën deri në shtator, zbatimin e ligjit dhe të të njëjtit standard në çështjen Balluku?”.
Në përfundim, Bardhi theksoi se SPAK duhet të veprojë pa vonesa dhe të mos ndikohet nga, sipas tij, interesat politike.
“Prokuroria e Posaçme ka vetëm një mënyrë për ta kaluar testin e besueshmërisë në çështjen Balluku: të mos bëjë politikë sipas interesave të momentit të Kryeministrit, por të zbatojë ligjin. Çdo ditë që kalon pa iu drejtuar Kuvendit është një ditë e keqe për drejtësinë dhe për Shqipërinë”, deklaroi kreu i grupit parlamentar të PD-së.a.b
