Një nga pjesëmarrësit në protestën e 28-të kombëtare përpara Kryeministrisë hodhi akuza të forta ndaj kryeministrit Edi Rama dhe zëvendëskryeministres Belinda Balluku, duke i bërë ata përgjegjës për, sipas tij, bllokimin e zhvillimit të turizmit dhe projekteve strategjike të infrastrukturës.
Nga foltorja e protestës, i riu u ndal te situata e Aeroportit të Vlorës, duke pretenduar se vonesat në nisjen e fluturimeve lidhen me interesa klienteliste dhe mosmarrëveshje mes aktorëve të përfshirë në projekt.
“A ka sabotim më të madh të turizmit sesa fakti që Edi Rama dhe Belinda Balluku kanë marrë peng Aeroportin e Vlorës? Këtë vit duhet të kishim turistët e parë që do të vinin nga ky aeroport, por për shkak se janë prishur pazaret mes oligarkëve, Ramës dhe Ballukut, ata po sabotojnë turizmin”, deklaroi ai para protestuesve.
Deklarata u prit me duartrokitje nga pjesëmarrësit në tubim, ndërsa protesta vijoi me fjalime të tjera kundër qeverisë dhe mënyrës së administrimit të projekteve publike.a.b
