Protestës së 28-të kombëtare përpara Kryeministrisë iu bashkua edhe eurodeputetja e së majtës italiane Ilaria Salis, e cila mbajti një fjalim para qytetarëve të mbledhur në bulevardin “Dëshmorët e Kombit”, duke shprehur mbështetjen e saj për lëvizjen protestuese.
Në fjalën e saj, Salis e cilësoi qëndresën e qytetarëve shqiptarë si një shembull kuraje dhe solidariteti, duke deklaruar se ajo që po ndodh në rrugët e Tiranës përfaqëson një vizion më të mirë për Evropën. Sipas saj, “revolucioni i flamengove” po përcjell një mesazh që shkon përtej kufijve të Shqipërisë.
Eurodeputetja u ndal edhe te mbrojtja e pasurive natyrore të vendit, duke kundërshtuar projektet që, sipas saj, rrezikojnë zona me rëndësi të veçantë.
“Shqipëria, toka e saj, bukuria e saj dhe pasuria e saj kulturore nuk janë mall për t’u shitur ofertuesit më të lartë. Ishulli i Sazanit dhe Laguna e Nartës duhet të mbeten zona të mbrojtura për të gjithë dhe për brezat që do të vijnë. Ato nuk duhet të kthehen në një park argëtimi për të pasurit”, u shpreh Salis.
Ajo tha se qytetarët kanë të drejtë të kundërshtojnë korrupsionin dhe privilegjet që, sipas saj, favorizojnë një pakicë në dëm të interesit publik. Salis theksoi se ky fenomen nuk është i kufizuar vetëm në Shqipëri, por përbën një problem edhe në vende të tjera të Evropës dhe botës.
Në përfundim të fjalës së saj, eurodeputetja italiane vlerësoi pjesëmarrjen dhe qëndresën e protestuesve, duke theksuar se ata po japin një shembull të rëndësishëm të angazhimit qytetar, dinjitetit dhe mbrojtjes së interesit publik. a.b
