Protesta qytetare kundër qeverisë së kryeministrit Edi Rama ka vijuar edhe në ditën e saj të 26-të, ndërsa organizatorët kanë bërë thirrje për një mobilizim kombëtar në fundjavë, me synimin për të mbledhur qytetarë nga i gjithë vendi në Tiranë.
Nga sheshi përpara Kryeministrisë, një prej protestueseve u bëri thirrje qytetarëve të mos ndalin pjesëmarrjen në tubime dhe njoftoi organizimin e një proteste kombëtare të shtunën, ku, sipas saj, pritet të marrin pjesë protestues nga të gjitha qytetet e Shqipërisë.
“Nga ky shesh kërkojmë një Shqipëri të Re. Të shtunën të gjitha qytetet bashkohen në Tiranë, në një protestë kombëtare për të kërkuar dhe ndërtuar një Shqipëri të Re”, deklaroi ajo para të pranishmëve.
Pas tubimit para Kryeministrisë, protestuesit marshuan drejt Kuvendit, ku vijuan thirrjet kundër qeverisë dhe Parlamentit. Gjatë marshimit u dëgjuan slogane si “Parlament analfabet”, “Parlamenti i krimit”, “Poshtë diktatura”, “Ju erdhi fundi”, “Shqipëria kërkon revolucion” dhe “Shqipëria e Re”.
Pjesëmarrësit ritheksuan se mbeten të vendosur në kërkesën e tyre për dorëheqjen e kryeministrit Edi Rama dhe largimin e qeverisë.
Organizatorët u kanë bërë thirrje qytetarëve nga të gjitha qarqet e vendit që t’i bashkohen protestës së paralajmëruar për të shtunën, duke e cilësuar atë si një tubim mbarëkombëtar kundër qeverisë.
