Eurodeputetja gjermane Jutta Paulus shpreh mbështetje për protestat në Shqipëri, paralajmëron pjesëmarrjen e saj
Eurodeputetja gjermane Jutta Paulus ka shprehur publikisht mbështetjen e saj për protestat qytetare që po zhvillohen në Shqipëri dhe që kanë hyrë në ditën e 26-të.
Përmes një postimi në rrjetet sociale, Paulus përdori flamingon si simbol të rezistencës së banorëve dhe aktivistëve mjedisorë që kundërshtojnë projektet e planifikuara në zonën e Vjosë-Nartë.
Në komunikimin e saj me ndjekësit, eurodeputetja iu përgjigj një komentuesi duke bërë të ditur se synon t’u bashkohet protestuesve në Shqipëri.
“Do të bashkohem me protestat të hënën e ardhshme”, shkroi ajo.
Deklarata e eurodeputetes vjen në një moment kur protestat kundër qeverisë së kryeministrit Edi Rama vijojnë prej afro një muaji. Çdo ditë, qytetarë në Tiranë dhe qytete të tjera të vendit janë mbledhur në sheshe dhe rrugë, duke kërkuar dorëheqjen e kryeministrit dhe ndryshime në qeverisje.
Mbështetja e shprehur nga Paulus shihet nga organizatorët si një sinjal vëmendjeje ndërkombëtare ndaj kauzave që po ngrihen nga protestuesit, veçanërisht për çështjet që lidhen me mbrojtjen e mjedisit dhe zonave të mbrojtura.a.b
