Policia e Durrësit ka arrestuar në flagrancë dy persona të dyshuar si autorë të dy ngjarjeve të rënda të regjistruara mbrëmjen e së mërkurës në Sukth dhe në Kavajë, ku një person humbi jetën dhe tre të tjerë mbetën të plagosur.
Sipas njoftimit zyrtar, specialistët për Hetimin e Krimeve të Rënda, në bashkëpunim me komisariatet e Policisë Durrës dhe Kavajë, vunë në pranga shtetasin D.L., 32 vjeç, banues në fshatin Sukth.
Ai dyshohet se, gjatë një konflikti për motive të dobëta, ka goditur me thikë tre persona, konkretisht Xh.L., 60 vjeç, B.L., 34 vjeç, babë e bir, si dhe F.T., 28 vjeç. Të plagosurit janë transportuar në spital, ku po marrin ndihmën e nevojshme mjekësore.
Në një tjetër rast, policia arrestoi shtetasin Muharrem Rreshka, 76 vjeç, i dyshuar për vrasjen e vëllait të tij, Eqerem Rreshka, 74 vjeç, në fshatin Agonas të Kavajës. Sipas hetimeve paraprake, krimi ka ndodhur pas një konflikti për motive të dobëta, ku i moshuari dyshohet se e goditi vëllanë me thikë, duke i shkaktuar plagë fatale.
Gjatë veprimeve hetimore janë sekuestruar dy thikat që dyshohet se janë përdorur në kryerjen e këtyre ngjarjeve dhe që do t’i nënshtrohen ekspertizave përkatëse.
Policia bën me dije se grupet hetimore po vijojnë punën për zbardhjen e plotë të rrethanave të të dy rasteve, si dhe për sigurimin e provave që do të dokumentojnë ngjarjet.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës për veprime të mëtejshme. a.b
