Reshjet e dendura të shiut nuk i kanë ndalur protestuesit që të vijojnë tubimin e tyre përpara Kryeministrisë, në ditën e 25-të radhazi të protestës që kërkon dorëheqjen e kryeministrit Edi Rama.
Të pajisur me çadra dhe nën rrebeshet e shiut, qytetarët kanë vazhduar qëndresën e tyre, duke përsëritur thirrjet kundër qeverisë dhe duke kërkuar largimin e kryeministrit.
Protestuesit deklaruan se nuk do të tërhiqen deri në realizimin e kërkesave të tyre.
Gjatë tubimit, protestuesit paralajmëruan një mobilizim më të madh në fundjavë, duke bërë thirrje për pjesëmarrje masive në protestën e së shtunës në Tiranë.
Mbështetje për protestën shprehu edhe diaspora shqiptare. Një protestuese e ardhur nga jashtë vendit u bëri thirrje qytetarëve të qëndrojnë të bashkuar dhe të mos heqin dorë nga kauza e tyre.
“Nga diaspora, nga Zvicra, Franca dhe Gjermania ju mbështesim. Me të gjitha forcat tona do të punojmë bashkë me aleatët tanë për të ndërtuar një shtet demokratik. Mos lejoni që t’ju gënjejnë”, u shpreh ajo para protestuesve.
Tubimi para Kryeministrisë vijon prej 25 ditësh radhazi, ndërsa pjesëmarrësit këmbëngulin se do të vazhdojnë protestat deri në plotësimin e kërkesës së tyre kryesore për dorëheqjen e kryeministrit Edi Rama.m.k
