Pavarësisht reshjeve të shiut që kanë përfshirë kryeqytetin, qytetarët janë mbledhur sërish këtë të martë përpara Kryeministrisë, duke shënuar ditën e 25-të radhazi të protestës kundër qeverisë së drejtuar nga kryeministri Edi Rama.
Me pankarta në duar dhe thirrje kundër qeverisë, protestuesit kanë përsëritur kërkesën e tyre kryesore për dorëheqjen e panegociueshme të kryeministrit dhe largimin e qeverisë. Ata kanë bërë gjithashtu thirrje ndaj SPAK-ut që të veprojë dhe të vendosë drejtësi për çështjet që, sipas tyre, kanë dëmtuar interesin publik.
Gjatë tubimit, një prej protestuesve lexoi sërish kërkesat e revoltës qytetare, ndërsa paralajmëroi se lëvizja mund të hyjë në një fazë të re aksioni, deri në bllokimin e institucioneve shtetërore nëse kërkesat e tyre nuk merren parasysh.
“Shqiptarët kanë protestuar për 25 ditë me radhë dhe nuk do të tërhiqen nga kërkesa për dorëheqjen e qeverisë. Nëse nuk ka reagim, protesta do të përshkallëzohet”, u shpreh ai para të pranishmëve.
Protesta para Kryeministrisë vjen pas më shumë se tre javësh mobilizim të pandërprerë në Tiranë dhe qytete të tjera të vendit.a.b
