Një person ka humbur jetën dhe një tjetër ka mbetur i lënduar si pasojë e një zjarri të rënë mëngjesin e kësaj të shtune në zonën e Fllakës, në Durrës.
Sipas informacionit paraprak të policisë, rreth orës 08:00, zjarri ka rënë në një nga ambientet e magazinave të një subjekti me administrator shtetasin S. M., në zonën e Fllakës, Sektor Rinia.
Nga të dhënat paraprake dyshohet se flakët janë shkaktuar nga një bombul gazi në ambientin ku gatuhej për punonjësit.
Si pasojë e zjarrit, ka ndërruar jetë, dyshohet nga asfiksia, shtetasi O. M., rreth 25 vjeç, nga Bangladeshi. Ndërkohë, një tjetër shtetas, Ch. Ch., rreth 30 vjeç, nga Kenia, është dërguar në spital ku po merr ndihmë mjekësore.
Në vendngjarje kanë mbërritur menjëherë shërbimet e Policisë dhe zjarrfikëses, të cilat kanë bërë të mundur neutralizimin e flakëve.
Ndërkohë, grupi hetimor, nën drejtimin e Prokurorisë, po vijon punën për zbardhjen e plotë të rrethanave, përcaktimin e shkakut të zjarrit dhe dokumentimin ligjor të ngjarjes.
