Jasin Avdyli është arrestuar në Belgjikë, në kuadër të një operacioni antidrogë të zhvilluar nga SPAK, Policia e Shtetit dhe autoritetet belge. Avdyli është person i dënuar me 12 vite burg në kuadër të dosjeve “339” dhe “Volvo 4”, përfshirë çështjen e laboratorit të heroinës në Has.
Policia e Shtetit njoftoi se, si rezultat i bashkëpunimit me homologët në Belgjikë, është finalizuar një tjetër fazë e operacionit ndërkombëtar të koduar “The Wanted”.
Gjatë operacionit është lokalizuar dhe arrestuar në Belgjikë, me qëllim ekstradimin drejt Shqipërisë, një shtetas i shpallur në kërkim ndërkombëtar dhe i akuzuar nga GjKKO si pjesëtar i një grupi kriminal që ka trafikuar dhe shitur sasi të mëdha lëndësh narkotike në disa shtete.
Sipas Policisë së Shtetit, në bazë të informacioneve të shkëmbyera në kuadër të një hetimi për trafikimin e lëndëve narkotike, Interpol Tirana dhe homologët belgë kanë bërë të mundur lokalizimin dhe kapjen e J. K., alias Jasin Avdyli, 58 vjeç, banues në Shijak.
Ky shtetas ishte shpallur në kërkim ndërkombëtar nga Interpol Tirana, pasi Gjykata e Posaçme e Shkallës së Parë për Korrupsionin dhe Krimin e Organizuar, me vendim të datës 04.04.2023, i kishte caktuar masën e sigurisë “Arrest në burg” për veprat penale “Prodhimi dhe shitja e narkotikëve”, kryer në formën e bashkëpunimit të veçantë, atë të grupit të strukturuar kriminal, “Pastrimi i produkteve të veprës penale ose veprimtarisë kriminale”, “Grup i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.
Nga hetimet e SPAK dyshohet se 58-vjeçari ka qenë pjesë e një grupi që ka organizuar trafikimin e sasive të mëdha të lëndëve narkotike dhe shitjen e tyre në shtete të ndryshme.
Gjithashtu, sipas hetimeve, të ardhurat e përfituara nga veprimtaria kriminale dyshohet se janë investuar në dy pasuri të paluajtshme, lokale në Shijak.
Interpol Tirana vijon bashkëpunimin me homologët në Belgjikë për finalizimin e procedurave të ekstradimit të Jasin Avdylit drejt Shqipërisë.a.b
