Një ngjarje e rëndë është regjistruar gjatë orëve të para të mëngjesit në Tiranë, ku një 17-vjeçar mbeti i plagosur me armë zjarri, ndërsa policia ka vënë në pranga tre të rinj.
Sipas uniformave blu, rreth orës 01:40 është marrë njoftim se në rrugën “Berit Beker” ishte plagosur me armë zjarri një i mitur. Menjëherë në vendngjarje kanë shkuar shërbimet e Sektorit për Hetimin e Krimeve të Rënda për zbardhjen e plotë të rrethanave.
Nga hetimet paraprake rezulton se ngjarja ka ndodhur në banesën e shtetasit R. S., 19 vjeç. Ky i fundit, duke i treguar një armë zjarri pistoletë shokut të tij dhe duke menduar se arma nuk kishte fishek në fole, e ka shkrepur aksidentalisht, duke plagosur 17-vjeçarin.
Në përfundim të veprimeve të para hetimore, policia arrestoi në flagrancë 19-vjeçarin për veprat penale “Plagosja e rëndë nga pakujdesia”, “Veprime që pengojnë zbulimin e së vërtetës” dhe “Mbajtja pa leje e armëve dhe municionit luftarak”.
Gjithashtu, në pranga janë vënë edhe shtetasit A. V., 20 vjeç dhe H. H., 22 vjeç, të akuzuar për veprën penale “Veprime që pengojnë zbulimin e së vërtetës”.
Arma e zjarrit është sekuestruar nga policia, ndërsa 17-vjeçari ndodhet në spital nën kujdesin e mjekëve.
Policia bëri me dije se hetimet vijojnë për dokumentimin e plotë të rastit dhe sqarimin e të gjitha rrethanave të ngjarjes.
