Një 31-vjeçar është gjetur pa shenja jete mëngjesin e kësaj të premteje pranë mbikalimit të Shkozetit, në Durrës.
Sipas burimeve policore, viktima është shtetasi me iniciale D.D. Mësohet se i riu kishte shfaqur probleme shëndetësore dhe kishte njoftuar vetë familjarët, si edhe ambulancën, duke kërkuar ndihmë pasi nuk ndihej mirë.
Në vendngjarje kanë mbërritur menjëherë bluzat e bardha, të cilat e kanë transportuar me autoambulancë, por pavarësisht përpjekjeve të mjekëve, 31-vjeçari nuk ka mundur të mbijetojë.
Trupi i pajetë është dërguar në morgun e spitalit të Durrësit, ku pritet të kryhen ekzaminimet mjeko-ligjore për të përcaktuar shkakun e vdekjes.
Dyshimet paraprake flasin për një arrest kardiak, ndërsa grupi hetimor ka nisur punën për zbardhjen e plotë të rrethanave të ngjarjes.
