Pas fjalimeve para Kryeministrisë, qytetarët kanë vijuar marshimin në rrugët e Tiranës, në protestën e 108-të kundër qeverisë dhe kryeministrit Edi Rama.
Gjatë marshimit, protestuesit kanë vijuar me thirrjet “Shqipëria po bën revolucion”, “Nuk shitet Shqipëria, shitet qeveria”, “Ju erdhi fundi” dhe “Arrestoni Ramën”.
Sot bëhen 108 ditë nga nisja e revoltës kundër qeverisë, një protestë që vijon prej më shumë se tre muajsh dhe që, sipas protestuesve, është e ndryshme nga protestat e zhvilluara më parë.
Qytetarët shprehen të vendosur se nuk do të heqin dorë nga protesta deri në largimin e Ramës. Në marshim janë drejtuar akuza edhe ndaj opozitës, ndërsa protestuesit i kanë bërë thirrje SPAK-ut që të veprojë ndaj personave që ata i akuzojnë për korrupsion.
Mesazhi i përsëritur gjatë protestës është se qëndresa do të vazhdojë dhe presioni qytetar ndaj qeverisë do të vijojë edhe në ditët e ardhshme.
Në protestën e 108-të, një studente ka bërë thirrje për bashkimin e qytetarëve dhe veçanërisht të studentëve në revoltën kundër qeverisë.
“Ne studentët sot kapëm Taulant Ballën dhe ai meriton të ikë siç iku si frikacak. Ata e kanë vjedhur këtë komb…Bashkohuni sa më shpejt…Se edhe tetori erdhi. Ne do vazhdojmë dhe ju presim këtu në shesh. Bashkohuni studentë kombi na thërret dhe nuk na ndal më asgjë. Nuk ikim nga ky shesh. Të gjithë këta duhet të ikin, si Taulant Balla sot si frikacak”, tha ajo.
Ndërkohë, aktivisti Arben Kola ka bërë thirrje për një tjetër tubim para Parlamentit, duke deklaruar se Kuvendi do të mblidhet të enjten në një seancë urgjente për shqyrtimin e pesë projektligjeve.
Kola i akuzoi këto nisma se synojnë, sipas tij, të dëmtojnë interesat e qytetarëve shqiptarë dhe u bëri thirrje qytetarëve që t’i bashkohen protestës së paralajmëruar para Parlamentit.
“Ditën e enjte parlamenti i krimit rimblidhet me urgjencë për të kaluar 5 ligje që kanë për grabitjen e shqiptarëve. Ndaj atje janë kriminelët, tradhtarët. Ditën e enjte ora 10: të gjithë te Parlamenti i krimit”, ka thënë aktivisti Arben Kola në protestën e 108 kundër Ramës.a.b
