Gentian Likaj është thirrur në SPAK dhe është marrë në pyetje në cilësinë e personit ndaj të cilit po zhvillohen hetime, në kuadër të dosjes që lidhet me skandalin e tenderave në AKSHI.
Burime pranë hetimit bëjnë me dije se emri i Likajt është lidhur me shtetasin Ermal Beqiri, ndërsa Prokuroria e Posaçme po thellon verifikimet mbi rolin e personave dhe kompanive të dyshuara në skemën e manipulimit të tenderave publikë.
Sipas të dhënave hetimore, prokurorët e SPAK, Bledar Maksuti dhe Altin Dumani, kanë zgjeruar ndjeshëm hetimet për çështjen e AKSHI-t, duke përfshirë në dosje emra dhe subjekte të reja.
Në fokus të hetimeve është vendosur edhe kompania “Communication Progress”, në pronësi të Gentian Likajt, si dhe Arjola Koromani, të cilët dyshohet se kanë lidhje direkte me procedurat e tenderave të dyshuara si të manipuluara.
Burimet tregojnë se përfshirja e Likajt në një fazë më të avancuar të hetimit lidhet me prova të reja të siguruara nga SPAK, mes tyre komunikime dhe dëshmi të administruara nga prokurorët, të cilat pritet të hedhin më shumë dritë mbi mekanizmin e dyshuar korruptiv në Agjencinë Kombëtare të Shoqërisë së Informacionit.
