Një operacion antidrogë i zhvilluar nga Policia e Durrësit ka goditur një rrjet të shpërndarjes së lëndëve narkotike pranë shkollave në qytetin e Kavajës. Si rezultat i operacionit të koduar “Cleaning 4”, janë arrestuar 9 persona, ndërsa 3 të tjerë janë shpallur në kërkim.
Operacioni u zhvillua nga Seksioni për Hetimin e Narkotikëve, Forca e Posaçme “Shqiponja” dhe Forca Operacionale e DVP Durrës, në bashkëpunim me Prokurorinë pranë Gjykatës së Shkallës së Parë të Juridiksionit të Përgjithshëm Durrës.
Sipas Policisë, aksioni erdhi pas disa muajsh hetime me metoda speciale dhe mbi bazën e informacioneve të siguruara në rrugë operative për një grup personash që ushtronin aktivitetin kriminal të shitjes së drogës pranë shkollave në Kavajë.
Nga veprimet hetimore u dokumentua aktiviteti kriminal i 12 shtetasve të dyshuar për veprën penale “Prodhimi dhe shitja e narkotikëve”. Për 9 prej tyre u ekzekutua masa e sigurisë “Arrest në burg”, ndërsa 3 të tjerët janë shpallur në kërkim dhe po punohet për kapjen e tyre.
Të arrestuarit janë shtetas të moshave 20 deri në 48 vjeç, të gjithë banues në Kavajë.
Sipas hetimeve, ata bashkëpunonin me njëri-tjetrin në shpërndarjen e lëndëve narkotike pranë institucioneve arsimore të qytetit.
Gjatë operacionit, Policia sekuestroi sasi të lëndëve të dyshuara narkotike Kokainë dhe Cannabis Sativa, të ndara në doza gati për shitje, si dhe disa telefona celularë që dyshohet se përdoreshin për aktivitetin kriminal.
Materialet procedurale i janë referuar Prokurorisë së Durrësit për vijimin e hetimeve dhe dokumentimin e plotë të aktivitetit të grupit.a.b
